Алматыдағы арнайы операция: дропперлер ұсталды
Алматы полицейлері интернет-алаяқтық әрекеттері бойынша жүргізілген арнайы операция нәтижесінде екі күдіктіні ұстады. Олардың бірі – елімізге қылмыстық мақсатпен келген шетел азаматы. Тергеу барысында, бұл адамдар алаяқтық жолмен азаматтардың банк карталарынан ұрланған қаражатты қолма-қол ақшаға айналдырумен айналысқаны анықталды.
"Күдіктілер көлеңкелі интернет-арналардағы кураторлардың тапсырмаларын орындап, банкоматтардан ірі көлемде ақша шешіп, оның белгілі бір пайызын сыйақы ретінде алып отырған. Ізін жасыру үшін олар түрлі тәсілдерге, соның ішінде сыртқы келбеттерін өзгертуге дейін барған", - делінген хабарламада.
Құқық қорғаушылар қылмыстық әрекеттен алынған қаражаттың бір бөлігін тәркілеп үлгерді. Тергеу барысында олардың өзге де қылмыстық эпизодтарға қатыстылығы анықталып жатыр. Алдын ала мәлімет бойынша, қысқа мерзім ішінде күдіктілер 45 миллион теңгеден астам қаражатты қолма-қол ақшаға айналдырған.
"Полиция киберқылмысқа қатысты қылмыстық тізбектерді жүйелі түрде әшкерелеп, жолын кесіп келеді. Бұл бағыттағы жұмыстар үздіксіз жүргізіліп жатыр. Тағы бір ескертеріміз – ешқашан жеке деректеріңізді, банк картасының кодтарын бейтаныс адамдарға бермеңіз. Олар өздерін банк немесе мемлекеттік орган қызметкері ретінде таныстырса да, мұндай ақпаратты айту қауіпті. Егер сіз алаяқтық әрекетке тап болсаңыз, дереу полицияға хабарласыңыз", – деді Алматы Полиция департаменті киберқылмысқа қарсы күрес басқармасының бастығы Әнес Қалдыбаев.
Сілтемесіз жаңалық оқисыз ба? Онда Telegram желісінде парақшамызға тіркеліңіз!