Эрон ядровий қуролдан воз кечишга тайёр, Исроилга шарт қўйди

Эрон ҳукумати ўз ядровий дастурига оид муҳим баёнот билан чиқди. Мамлакат ташқи ишлар вазири Аббос Арагчи хорижий дипломатлар билан учрашувда Теҳроннинг ядровий қурол ишлаб чиқариш нияти йўқлигини яна бир бор таъкидлади ва буни халқаро даражада кафолатловчи шартнома тузишга тайёр эканини маълум қилди.

Аракчининг сўзларига кўра, Эрон ядровий қуролга эга бўлишни мақсад қилмаган ва бу позиция ўзгармас тамойил сифатида қолади. У мамлакатининг фақат тинч ядровий фаолият билан шуғулланаётганини таъкидлар экан, ядровий қуролсизланишга оид янги келишувларга очиқ эканини билдирди.

Шунингдек, вазир Эроннинг Исроилга қарши амалга оширган сўнгги ҳарбий зарбалари юзасидан ҳам ўз позициясини баён этди. Унинг таъкидлашича, бу ҳаракатлар мамлакатнинг ўзини ҳимоя қилиш мақсадида амалга оширилган.

“Агар Эронга қарши тажовузлар тўхтатиладиган бўлса, биз ҳам жавоб зарбаларини тўхтатамиз. Биз ҳеч қачон уруш истамаймиз, аммо ўз хавфсизлигимизни таъминлашни ҳам бошқаларга топширмаймиз”, — деди Аракчи.

Мазкур баёнот Эрон ва халқаро ҳамжамият ўртасидаги мураккаб муносабатлар давомида янграётгани билан аҳамиятлидир. Ҳозирда Ғарб давлатлари, хусусан АҚШ ва Европа Иттифоқи, Эроннинг ядровий фаолиятини диққат билан кузатмоқда. Мазкур таклиф ушбу тортишувларни юмшатиш ва дипломатик ечим топиш имкониятини яратиши мумкин.

Zamin.uz таҳририяти мазкур мавзу юзасидан юз бераётган барча ўзгариш ва расмий баёнотларни кузатишда давом этади.