Қуёшнинг жанубий қутби биринчи марта тасвирга олинди
Маълум қилинишича, Solar Orbiter қурилмаси сўнгги ойларда ўз орбитасини Қуёш экваторидан 17 даража пастга эгиб ҳаракатланган. Бу эса унга қуёш эклиптикаси деб аталадиган одатий ҳаракат текислигидан четга чиқиб, қуёшнинг сирли ва ўрганилмаган жанубий қутбига назар ташлаш имконини берди.
Таъкидланишича, ушбу қимматли фотосуратлар ва видеолар Қуёшнинг ташқи атмосферасидаги — яъни коронадаги — материя ҳаракатини таҳлил қилиш имконини беради. Бу эса ўз навбатида қуёш бўронлари, плазма чиқишлари каби жараёнларни олдиндан башорат қилиш, ҳаттоки Ердаги метеорологик ва технологик таъсирларни тушунишда қўл келиши мумкин.
ESA маълумотига кўра, суратлар Solar Orbiter аппаратининг ўзидаги 10 та илмий асбобдан учтаси — Extreme Ultraviolet Imager (EUI), Polarimetric and Helioseismic Imager (PHI) ҳамда Metis томонидан олинган.
Қуёшнинг қутб ҳудудлари астрономлар учун аллақачон қизиқиш уйғотган, чунки бу ерда магнит майдонлари пайдо бўлади ва Қуёш циклларига таъсир кўрсатади. Бугунги кунда Қуёш фаоллигининг янги босқичига кирганини ҳисобга олсак, ушбу суратлар келгусида юзага келиши мумкин бўлган геомагнит таъсирлар, радиоалоқа узилишлари ёки спутниклар фаолиятидаги муаммоларни олдиндан прогноз қилишда ёрдам бериши мумкин.
Қайд этиш жоиз, Solar Orbiter миссияси 2020 йилда ишга туширилган ва Европанинг ESA ҳамда АҚШнинг NASA агентликлари ҳамкорлигида амалга оширилмоқда. Унинг асосий вазифаси — Қуёшни яқин масофадан ўрганиб, инсониятга номаълум бўлган ҳудудлар ва жараёнлар ҳақида аниқ маълумотларни жамлашдир.
Қуёшнинг жанубий қутбини суратга олиш — бу шунчаки космик тасвир эмас, балки бутун инсоният учун янги кашфиёт, фан ва технология тараққиётининг яна бир рамзидир.
Solar Orbiter келгусида янада паст бурчаклардан сурат олиш орқали бу ҳудудларни тўлиқ тадқиқ этишни давом эттириши кутилмоқда.