Дешамга Саудиядан шов-шувли таклиф: у ЖЧ-2026дан кейин клуб бошқарадими?

Футбол оламидаги энг тажрибали мутахассислардан бири — Франция терма жамоасининг бош мураббийи Дидье Дешамга янги ва ғайриоддий таклиф пайдо бўлди. Саудия Арабистонининг суверен бойлик жамғармаси — ПИФ (Public Investment Fund) франциялик мутахассисга Жаҳон чемпионати-2026дан кейин маҳаллий клубларнинг бирига раҳбарлик қилишни таклиф этди. Бу ҳақда машҳур спорт журналисти Сача Таволиери ижтимоий тармоқларда хабар берди.

Манбаларга кўра, ПИФ вакиллари Дидье Дешамни Саудия Арабистонининг етакчи клубларидан бирига бош мураббий этиб кўришни исташмоқда. Франция футболининг афсонаси ҳисобланган Дешам бу қизиқишни хуш қабул қилган, аммо айни пайтда барча эътиборини терма жамоа билан ЖЧ-2026га тайёргарликка қаратганини билдирган.

Дешам 2012 йилдан буён Франция терма жамоасини бошқариб келмоқда ва 2018 йилда Франция билан жаҳон чемпионилик унвонини қўлга киритган. Унинг мамлакат футбол федерацияси билан тузган шартномаси 2026 йилги мундиал тугагунига қадар давом этади.

Маълумот учун, Саудия Арабистони ПИФ жамғармаси сўнгги йилларда Европанинг ва жаҳоннинг машҳур футбол мутахассислари ва юлдузларини мамлакат чемпионатига жалб этишда фаол ҳаракат қилмоқда. Дешамга қилинган таклиф ҳам шу стратегиянинг бир қисми эканлиги айтилади.