Кападзе: Байрам байрамдек бўлди, энди навбат Жаҳон чемпионатига!
— Ҳаммани ғалаба билан чин дилдан табриклайман, — дея сўз бошлади Кападзе. — Байрам байрамдек бўлди. Уйинда кўрсатилган интизом, ўзаро тушунув ва жонкуярликни алоҳида таъкидламоқчиман. Натижа ҳам, ўйин сифати ҳам мухлисларимизни хурсанд қилганига ишонаман. Юртимизни Жаҳон чемпионати йўлланмаси билан яна бир бор муборакбод этаман.
Ярим ҳимоячи Азизбек Турғунбоев ҳам ўз ҳис-туйғуларини баён этди:
— Барча юртдошларимизни ғалабамиз билан муборакбод этаман. Бизга ишонган, дуо қилган, стадионга келиб қўллаб-қувватлаган барчага ташаккур айтаман. Бу ютуқ барчамизнинг бирдамлиги, бир мақсад йўлидаги интилиши туфайли амалга ошди.
Тайёргарлик режалари қандай?
Кападзега кўра, гуруҳ босқичидаги сўнгги учрашувлар — БАА ва Қатарга қарши ўйинлар жамоанинг барча диққат-эътиборини тўлиқ тортиб турган. Энди эса жамоа Жаҳон чемпионати учун жиддий ва босқичма-босқич тайёргарлик режасини амалга оширади.
— Мусобақагача CAFA доирасидаги учрашувлар ва АҚШдан келадиган рақибларга қарши назорат учрашувлари режалаштирилган. Ўйлайманки, бу ўйинлар орқали жамоа етарлича тажриба тўплайди, — деди мураббий.
Тактика, таркиб ва истиқболлар
Саволларга жавоб берар экан, Кападзе жамоанинг тактик ёндашуви ҳақида ҳам фикр билдирди:
— Биз 3лик ва 4лик ҳимоя схемалари устида кўп ишладик. Бугун футболчилар рақибга имконият қолдирмасдан ўйинни назорат қилишди. Агар футболчилар соғлом ва яхши формада бўлишса, турли тактик моделлардан фойдаланамиз. Ротациялар ҳам бўлади.
Мураббий сифатидаги келажакчи?
Вақтинча бош мураббий сифатида иш олиб борган Кападзега, шартнома масаласида қандай келишув борлиги ҳақида савол берилганда, у шундай жавоб қайтарди:
— Бу ҳақда раҳбариятдан сўрасангиз тўғри бўлади.
Шу билан бирга, у ўз вазифасини сидқидилдан бажараётганини ва жамоа учун бор кучини сарфлаётганини таъкидлади.
Терма жамоамизнинг Жаҳон чемпионатига чиқиши нафақат футбол саҳнасидаги улкан ютуқ, балки бутун мамлакат учун катта ғурур бўлди. Энди эса навбатда — катта мусобақа учун муносиб тайёргарлик!