Ўзбекистонда тўлов тизимлари кибержиноятлардан ҳимояланади
Тўлов тизимлари ва тўлов ташкилотларини тартибга солиш тўғрисидаги қонун лойиҳаси Қонунчилик палатасидан ўтди, дея хабар берди Олий Мажлис Қонунчилик палатаси матбуот хизмати.
Маълумотга кўра, депутатлар нақд пулсиз тўловлар соҳасида хатарларни бошқаришни такомиллаштириш бўйича қонун лойиҳасини биринчи ва иккинчи ўқишда қабул қилдилар. Ушбу лойиҳа "Марказий банк тўғрисида", "Тўловлар ва тўлов тизимлари тўғрисида", "Акциядорлик жамиятлари ва акциядорлар ҳуқуқларини ҳимоя қилиш тўғрисида", "Лицензиялаш, рухсат бериш ва хабардор қилиш тартиб-қоидалари тўғрисида"ги қонунларга тузатишлар ва қўшимчаларни ўз ичига олади.
Хусусан, лойиҳада барча тўлов тизимлари ва хизматлари операторлари хатарларни бошқариш тизимини жорий этиши ва Марказий банк томонидан белгиланган минимал талабларга риоя этиши назарда тутилган. Қайд этилишича, бу чоралар фирибгарлик ва бошқа турдаги кибержиноят хатарларининг ўсиши билан боғлиқ.
Ҳукумат тўлов ташкилотларини фаолият соҳасига қараб тоифаларга ажратишни режалаштирмоқда. Шунингдек, муҳим тўлов ташкилоти тушунчаси пайдо бўлади. Ҳужжат кучга киришидан олдин Сенат томонидан маъқулланиши ва президент томонидан имзоланиши керак.