Թրամփը հայտարարել է, որ Իրանը ներգրավված է Գազայի հատվածում պահվող պատանդների շուրջ բանակցություններին
ԱՄՆ նախագահ Դոնալդ Թրամփը հայտարարել է, որ Իրանը ներգրավված է բանակցություններին՝ ուղղված Իսրայելի և պաղեստինյան ՀԱՄԱՍ շարժման միջև հրադադարի և պատանդների վերադարձի շուրջ համաձայնագրի կնքմանը: «Արմենպրես»-ի փոխանցմամբ՝ այս մասին հաղորդում է Reuters գործակալությունը։
«Գազայի հատվածն այս պահին մեր, ՀԱՄԱՍ-ի և Իսրայելի միջև խոշոր բանակցությունների առանցքում է, և Իրանն իրականում ներգրավված է, և մենք կտեսնենք, թե ինչ կլինի Գազայի հետ: Մենք ցանկանում ենք վերադարձնել պատանդներին», – ասել է Թրամփը լրագրողներին հունիսի 9-ին Սպիտակ տանը տեղի ունեցած միջոցառման ժամանակ:
Թրամփն այլ մանրամասներ չի հայտնել, իսկ Սպիտակ տունը և ՄԱԿ-ում Իրանի առաքելությունը դեռ չեն արձագանքել Իրանի մասնակցության մանրամասների վերաբերյալ հարցմանը:
ԱՄՆ-ն առաջարկել է Իսրայելի և ՀԱՄԱՍ-ի միջև 60-օրյա հրադադար հաստատել։ Իսրայելը հայտարարել է, որ կպահպանի պայմանները, սակայն ՀԱՄԱՍ-ը մերժել է այդ ծրագիրը:
Առաջարկի համաձայն՝ 28 իսրայելցի պատանդներ և մահացած պատանդների մարմիններ կվերադարձվեն առաջին շաբաթվա ընթացքում՝ 1236 պաղեստինցի բանտարկյալների և 180 մահացած պաղեստինցիների մարմինների վերադարձի դիմաց։
The post Թրամփը հայտարարել է, որ Իրանը ներգրավված է Գազայի հատվածում պահվող պատանդների շուրջ բանակցություններին first appeared on MediaLab Newsroom-Laboratory.