Австриядағы қанды оқиға: мектеп оқушысы атыс шығарған
Австрияның Грац қаласындағы мектептердің бірінде атыс болды. Қаза тапқандар мен зардап шеккендер бар, - деп хабарлайды Tengrinews.kz тілшісі Krone басылымына сілтеме жасап.
Соңғы мәліметтерге сәйкес, сегіз адамның қаза тапқаны расталды, жараланғандар бар. Олардың көпшілігінің жағдайы ауыр.
Жергілікті БАҚ мәліметінше, оқ атқан адам – сол мектептің оқушысы. Алдын ала мәлімет бойынша, ол екі сыныпқа кіріп, оқ жаудырған. Куәгерлердің айтуынша, шамамен 20 рет оқ атылған. Шабуылдан кейін күдіктінің мәйіті мектептің әжетханасынан табылды – ол өзіне-өзі қол жұмсаған болуы мүмкін.
Алдын ала мәлімет бойынша, жасөспірім өзін қысымның құрбаны санаған.
Оқиға орнында полиция мен Cobra арнайы жасағы жұмыс істеп жатыр. Мектеп толықтай қоршауға алынып, ғимаратқа тінту жүргізіліп жатыр.
Австриядағы барлық ішкі саяси іс-шаралар тоқтатылды. Елдің ішкі істер министрі Герхард Карнер оқиға орнына шұғыл жеткен. Билік тұрғындарды арнайы операция жүріп жатқан аумаққа жақындамауға шақырды.
Мұғалімдердің бірінің күйеуінің айтуынша, әйелі бірнеше атыс дауысын естігеннен кейін оқушылармен бірге сыныпқа бекініп алған.
Сондай-ақ, қашып құтылған оқушылардың ата-аналары балаларымен қауыша бастады.
Жараланған оқушыларға медициналық көмек көрсетіліп жатқаны айтылды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!