320-ზე მეტი დრონი და რაკეტა - უკრაინაზე რუსეთის შეტევის მთავარი სამიზნე კიევი იყო
უკრაინაზე მორიგი მასირებული შეტევისთვის, რომელიც გასულ ღამით დაიწყო და დილამდე გაგრძელდა, რუსეთის ჯარებმა 315 უპილოტო საფრენი აპარატი, 2 ბალისტიკური რაკეტა და 5 ფრთოსანი რაკეტა გამოიყენეს.
ეს მონაცემები დღეს, 10 ივნისს დილით გამოაქვეყნა უკრაინის საჰაერო ძალების სარდლობამ. მისი ინფორმაციით, დარტყმის ძირითადი მიმართულება იყო უკრაინის დედაქალაქი კიევი.
საჰაერო ძალების სარდლობის თანახმად, თავდაცვის ძალებმა მოიგერიეს 7-ვე რაკეტა და 213 უპილოტო საფრენი აპარატი, კიდევ 64 დრონი კი ლოკალურად დაიკარგა.
სარდლობის ინფორმაციით, მოწინააღმდეგის საჰაერო თავდასხმის საშუალებებით დარტყმა დაფიქსირებულია 11 ადგილზე, ხოლო ნამსხვრევების ჩამოცვენა - 16-ზე.
უკრაინის საგანგებო სიტუაციების სამსახურის მონაცემებით, რუსეთის მორიგმა მასირებულმა შეტევამ ნგრევა და ხანძრები გამოიწვია კიევის შვიდ რაიონში. დაშავდა ოთხი ადამიანი. კიევში დანგრეული ან დაზიანებულია სახლები, ბიზნეს-ცენტრი, საწყობები და რკინიგზა.
რუსეთის ჯარების სამიზნე იყო ქალაქი ოდესაც, სადაც საოლქო პროკურატურის ცნობით, ორი ადამიანი დაიღუპა და ცხრა დაშავდა. ადგილობრივი ხელისუფლების ინფორმაციით, დაზიანებულია სახლები, სამშობიარო სახლის ადმინისტრაციული შენობა, გადაუდებელი სამედიცინო დახმარების სადგური, კერძო კლინიკა, სპორტული კომპლექსი და რკინიგზის სადგურის შენობა.
რუსეთის მორიგი მასირებული შეტევის გამო ხუთ საათზე მეტხანს გაგრძელდა საჰაერო განგაში, რომლის დროსაც მოქალაქეები ვალდებული არიან, თავი უსაფრთხო ადგილებს შეაფარონ.
ივნისის დასაწყისიდან რუსეთის ჯარებმა კიდევ უფრო ინტენსიური გახადეს უკრაინაზე შეტევა, განსაკუთრებით დედაქალაქ კიევზე.
რუსეთის თავდაცვის სამინისტრომ განაცხადა, რომ ეს არის პასუხი სამხედრო აეროდრომებზე უკრაინის თავდასხმებზე, რომლებსაც „ტერორისტულს" უწოდებს. რუსეთი ირწმუნება, რომ უკრაინაში სამიზნე მხოლოდ სამხედრო ობიექტებია და არაფერს ამბობს მშვიდობიან მოსახლეობაში მსხვერპლისა და სამოქალაქო ობიექტების ნგრევის შესახებ.
2025 წლის ივნისის დასაწყისიდან უკრაინის შეიარაღებული ძალების გენერალურმა შტაბმა და უსაფრთხოების სამსახურმა სამჯერ განაცხადეს რუსეთის სხვადასხვა ოლქში სამხედრო აეროდრომებზე შეტევის შესახებ.