Испания терма жамоаси бош мураббийи: Роналду футбол афсонаси, унга ҳурматим баланд

Бугун тунда футбол мухлисларини Миллатлар лигаси финалидаги юқори даражадаги тўқнашув кутиб турибди — Испания ва Португалия терма жамоалари чемпионлик учун майдонга тушишади. Беллашув олдидан Испания терма жамоаси бош мураббийи Луис де ла Фуэнте матбуот анжуманида иштирок этиб, рақиб жамоанинг сардори Криштиану Роналду ҳақида самимий фикрлар билдирди.

Таниқли мураббий Роналдуни нафақат футбол афсонаси, балки спортдаги чин инсоний қадриятларни тарғиб қилувчи шахс сифатида таърифлади:

“Мен доимо мен учун қадрли бўлган инсонлардан келган эътироф ва эҳтиромни юрагим билан ҳис қилганман. Криштианунинг сўзларини жуда қадрлайман. Ўз навбатида, мен ҳам унга чуқур ҳурматимни билдираман. У бутун дунё футбол жамоатчилиги учун ибрат намунасидир.”

Де ла Фуэнтега кўра, Роналду нафақат Португалиянинг шарафини муносиб ҳимоя қилиб келаётган футболчи, балки “тарихда из қолдирган шахс” ҳисобланади. Унинг таъкидлашича, шундай улкан шахс етакчилигидаги жамоага қарши ўйнаш — ҳар қандай мураббий учун фахр.

Маълумки, Криштиану Роналду аввалроқ ўз интервьюларидан бирида Испания терма жамоасини дунёдаги энг кучли жамоалардан бири сифатида тилга олган эди. Демак, бу ўзаро ҳурмат икки томонлама.

Беллашув Тошкент вақти билан 00:00 да старт олади. Финал доирасидаги бу тўқнашув нафақат чемпионлик масаласини ҳал қилади, балки Иберия яриморолининг икки гранд футбол мактаби ўртасидаги навбатдаги тарихий саҳифани яратади.