Пентагон сирлари очилди: ўзга сайёраликларми ёки махфий ҳазилми?
Америка Қўшма Штатлари Мудофаа вазирлиги қошида ташкил этилган Аномалияларни тадқиқ этиш бўлими (AARO) бугунга қадар тарқатилган турли конспирологик назарияларни ўрганиб чиқиб, уларнинг манбасини аниқлади. Машҳур The Wall Street Journal нашрининг ёзишича, кўплаб фейк хабарлар ва нотўғри маълумотлар айнан Пентагоннинг юқори даражадаги ҳарбий ходимлари томонидан тарқатилган экан.
2024 йилда тайёрланган ҳисоботга кўра, АҚШ Мудофаа вазирлиги ўз репутациясини ҳимоя қилиш мақсадида бу каби маълумотларни яширишга уриниш ҳолатлари ҳам аниқланган. Ҳисоботда қайд этилишича, НУЖ билан боғлиқ аксарият ҳолатларнинг пайдо бўлиши АҚШ ҳарбийлари ўртасида кенг тарқалган ҳазил-мутойибаларнинг натижаси сифатида юзага келган.
Бундай дезинформация тарқатилган биринчи ҳолат узоқ 1980 йилларга бориб тақалади. Ўша вақтда АҚШ Ҳарбий-ҳаво кучлари полковниги машҳур «51-ҳудуд» базаси яқинидаги кичик бир барда аҳолига «учар ликопча»лар тасвирланган суратларни кўрсатган. Унинг бу «ҳазил» амалиёти аслида маҳаллий аҳоли эътиборини яширин янги ҳарбий самолёт — F-117 Nighthawk стелс-қирувчисининг синов парвозларидан чалғитиш учун махсус режалаштирилган эди. Пентагон юқори раҳбарияти бу усул орқали «совуқ уруш» даврида душманларга АҚШдаги махфий ҳарбий технологиялар ҳақидаги маълумотларнинг сизиб чиқишининг олдини олган.
Тергов натижаларига кўра, бу каби «ҳазил»лар бир неча ўн йилликлар давомида ҳарбий хизматчилар ўртасида кенг тарқалган ва ҳатто баъзи юқори лавозимдаги офицерлар ўзлари ҳам бунинг ҳазил эканлигини билмай қолган. Мисол учун, янги командирларга кўп йиллар давомида, АҚШ Ҳарбий-ҳаво кучлари қўлида ўзга сайёраликларнинг учувчи кемалари ҳақидаги сохта тасвирлар ҳамда материаллар «Yankee Blue» номи остида топшириб келинган. Натижада бу соҳада ишлаган айрим ҳарбийлар шу пайтгача ўзга сайёраларда ҳаёт мавжудлигига ишонишни давом эттирмоқда.
2023 йил баҳорида эса Пентагон раҳбарияти ушбу «ҳазил амалиёти»ни зудлик билан тўхтатиш бўйича махсус топшириқ берган. Унга кўра, армия ичида нотўғри маълумотлар тарқатиш расман тақиқланди ва юқори офицерларга бу каби ҳазилларнинг энди қабул қилинмаслиги қатъий огоҳлантирилди.
Аммо бу борадаги баҳслар шу билан тугагани йўқ. 2023 йилнинг ёзида АҚШ Конгрессида Ердан ташқари мавжудотлар ва уларнинг Ердаги алоқалари бўйича махсус эшитувлар ҳам бўлиб ўтган. Эшитувда Америка разведкасининг собиқ ходими Дэвид Граш чиқиш қилиб, Пентагон қарийб 1930-йиллардан бери америкаликлардан ўзга сайёраликлар билан бўлган алоқалар ҳақидаги маълумотларни яшириб келаётганини маълум қилган эди. Бу баёнотлар жамоатчилик орасида катта шов-шувларга сабаб бўлган.
Бу каби баҳсли маълумотлар ва терговлар натижаси бугун ҳам кўпчиликнинг эътибор марказида қолмоқда. Бир томондан бу воқеалар дунё аҳлини қизиқтирса, бошқа томондан Пентагон ўз обрўсини сақлаш учун қайта-қайта маълумотларни назорат қилишга ва ўз амалиётларини махфий сақлашга интилмоқда.
Шундай қилиб, инсониятнинг узоқ йиллик қизиқишлари бўлган Ердан ташқари мавжудотлар мавзуси Пентагоннинг сирли амалиётлари сабаб янада мураккаблашиб кетди. Аммо бу мавзудаги мунозаралар ва талашувлар келгусида ҳам давом этиши шубҳасиздир.
Пентагоннинг сирлари очилган бўлса-да, инсоният учун бу саволлар ҳамон сирли ва қизиқлигича қолмоқда: Ерда чиндан ҳам ўзга сайёраликлар мавжудми ёки бу барчаси фақат ҳарбийлар томонидан тарқатилган ҳазилнинг натижасими?