Ավելի քան կիսով կրճատվել է ծառայողական մեքենաների քանակը. Արայիկ Հարությունյան
Ավելի քան կիսով կրճատվել է [ծառայողական] մեքենաների քանակը: Ծախսերն այս պահին առանձին տողով կդժվարանամ ասել: Մենք դա ավելի շատ կարող ենք տեսնել 2025 թվականին, որովհետև, ըստ էության, մեքենաների կրճատումը եղել է տարեվերջին: Այդ մասին ԱԺ մշտական հանձնաժողովների համատեղ նիստի ժամանակ՝ 2024 թվականի պետբյուջեի կատարողականի նախնական քննարկումներին, ասաց վարչապետի աշխատակազմի ղեկավար Արայիկ Հարությունյանը՝ անդրադառնալով ծառայողական ավտոմեքենաների թվի մասով շատ հաճախ հնչող հարցադրումներին:
«Բայց շեշտակի է լինելու կրճատումը, նախ որովհետև երկու անգամ պակասել են մեքենաները, և երկրորդ՝ մեքենաների մի մասն էլեկտրական է կամ հիբրիդ, այսինքն՝ էլեկտրականությամբ են լիցքավորվում այդ մեքենաները: 40 մեքենայի տեղն այս պահին ունենք 19 մեքենա»,- ասաց նա:
Արայիկ Հարությունյանը նաև տեղեկացրեց, որ մեքենաների գնումն ամբողջությամբ իրականացնում է Պետական գույքի կառավարման կոմիտեն:
«Շատ հաճախ երբեմն արժի մի քիչ ավելի թանկ մեքենա գնել, բայց հինը հանձնել, որովհետև տարվա ընթացքում հին մեքենաների վրա շատ ավելի մեծ ծախսեր են լինում: Այսինքն՝ մենք նոր մեքենաների վրա առաջիկա տարիներին, ըստ էության, ծախսեր չենք անի, և շահագործման ծախսերը կկոմպենսացնեն գնման ծախսերը»,- ասաց նա:
Պատգամավոր Գեղամ Նազարյանի հարցին, թե հետաքրքրվո՞ւմ է՝ արդյոք «Կրթվելը նորաձև է» ծրագիրն իրականացվում է պետբյուջեի՞ հաշվին, թե՞ մասնավոր միջոցներով կամ հիմնադրամներով, Արայիկ Հարությունյանը պատասխանեց. «Այո՛, դա վարչապետի միջոցառումն է, վարչապետի առաջնահերթ ծրագրերից մեկը, որն իրականացվում է աշխատակազմի միջոցներով»:
The post Ավելի քան կիսով կրճատվել է ծառայողական մեքենաների քանակը. Արայիկ Հարությունյան first appeared on MediaLab Newsroom-Laboratory.