Орзулар рўёбига чиққан кун: Аббосбек Файзуллаевнинг ҳиссиётлари
«Ҳозирги ҳиссиётларимни сўзлар билан ифодалаш қийин. Ёшлигимдан бу кунни орзу қилиб катта бўлганман. Болаликда телевизор орқали жаҳон чемпионатларини кузатиб, миллий жамоамиз майдонга тушиши учун доим дуо қилардим. Бу буюк мусобақада қатнашиш орзуси қалбимизни тўлдирган эди ва бугун ана шу орзуга етдик. Биз бу муваффақиятга эришганимиздан чексиз хурсандмиз», — дея ўз ҳис-туйғуларини яширмади футболчи.
Аббосбек Файзуллаев шунингдек, Ўзбекистон Республикаси Президенти Шавкат Мирзиёевнинг ўйиндан сўнг миллий жамоа бош мураббийи ва футболчиларга шахсан қўнғироқ қилиб табриклагани ҳақида ҳам тўлқинланиб гапирди.
«Муҳтарам Президентимиз бизга шахсан қўнғироқ қилиб, самимий ва илиқ табрикларини йўлладилар. Давлатимиз раҳбарининг бизга бўлган алоҳида эътибори ва қўллаб-қувватлаши футболчиларимиз учун катта руҳий далда бўлди. Уларга катта раҳмат айтаман. Бу эътибор ва меҳр ўзининг самарасини берди», — дея таъкидлади Файзуллаев.
Ёш футболчи ушбу тарихий муваффақиятни кутиб келган Ўзбекистон халқини ҳам алоҳида табриклади.
«Ўзбекистон халқини чин юракдан табриклайман. Бу муваффақиятга халқимиз ҳақли эди ва улар буни узоқ кутдилар. Биз эса ана шу катта ишонч ва орзуларни амалга оширишда иштирок этганимиздан ғурурланамиз ва бундан мамнунмиз», — деди футболчи.
Энди Аббосбек Файзуллаев ва терма жамоамизнинг бошқа аъзолари 2026 йили АҚШ, Канада ва Мексикада бўлиб ўтадиган Жаҳон чемпионатида Ўзбекистон шарафини ҳимоя қилишади. Мазкур йўлланма мамлакатимиз футболининг янги тарихига тилла ҳарфлар билан ёзиладиган воқеа бўлди.
Манба: championat.asia