Қозоғистон матбуот котиби: "Бўлди, Ўзбекистонга кўчиб кетаман!"

Қозоғистон миллий терма жамоаси матбуот хизмати раҳбари Ермухаммед Маулен ўз мамлакатининг Беларусга қарши ўйиндаги мағлубиятига муносабат билдириб, айни вақтда Ўзбекистон термасининг тарихий ютуғига урғу берди.

«Беларусга қарши ўртоқлик учрашувининг 31-дақиқасида ҳисоб 0:2, биз мағлубиятга юз тутмоқдамиз. Майдондаги ғалати хатоларни кўриб, стадионда ўтирган ҳолда на кулишни, на йиғлашни билмай қолдим. Менимча, бу вазиятда кулиш керак, чунки йиғлашдан фойда йўқ», — деб ёзади Маулен.

У ўша пайтда қўшни мамлакат футболи учун тарихий воқеа юз берганидан хабар топганини таъкидлайди: «Сизларга ажойиб янгилигим бор: Ўзбекистон миллий жамоаси ўз тарихида илк бор жаҳон чемпионатига йўлланмани қўлга киритди! Ўзбек оғаларни чин дилдан табриклайман!»

Маулен ўзбек футболи бугунги кунда қозоқ футболидан анча олдинлаб кетганини тан олиш вақти келганини айтиб ўтади.

«Бир пайтлар подкастда ҳам таъкидлаган эдим, аммо негадир бизнинг футболимиз ўзбек футболидан ортда қолганини тан олгимиз келмайди. Бугунги кун бунга яққол исбот бўлди. Ҳозир ўзингиз солиштириб кўришингиз мумкин: биз Беларусь билан ўйинда 0:2 ҳисобида ютқазмоқдамиз, Ўзбекистон эса мундиалга чиқяпти. Бизда ҳозир майдондаги футболчилардан биронтаси гол уришни истамайдигандек кўриняпти. Ахир, бунга қандай чидаш мумкин?! Менинг энди кўчиб кетгим келяпти, Ўзбекистонга!» — деб ҳазиллашади матбуот котиби.

Эслатиб ўтамиз, Беларусга қарши ўртоқлик ўйини Қозоғистон учун 1:4 ҳисобидаги йирик мағлубият билан якунланди. Шу куни Ўзбекистон миллий жамоаси эса БАА майдонида ўта муҳим дуранг натижа (0:0) қайд этиб, АҚШ, Канада ва Мексика мезбонлик қиладиган 2026 йилги мундиалга тўғридан-тўғри йўлланмани қўлга киритди. Бу ютуқ Ўзбекистон учун футбол тарихидаги илк бор жаҳон чемпионатида қатнашиш имкониятини тақдим этди.

Манба: sports.kz