ტრამპმა და სი ძინპინმა აშშ-ჩინეთის სავაჭრო ურთიერთობები განიხილეს
ხუთშაბათს აშშ-ის პრეზიდენტ დონალდ ტრამპსა და ჩინეთის პრეზიდენტ სი ძინპინს შორის სატელეფონო საუბარი გაიმართა ორ ქვეყანას შორის მიმდინარე სავაჭრო ომის ფონზე. ტრამპმა თქვა, რომ სი ძინპინმა ის ჩინეთში მიიწვია.
სოციალურ მედიაში გამოქვეყნებულ პოსტში ტრამპმა განაცხადა, რომ ლიდერებმა განიხილეს „ბოლო დროს მიღწეული სავაჭრო შეთანხმების ზოგიერთი დეტალი“. ტრამპის თქმით, საუბარი დაახლოებით საათ-ნახევარს გაგრძელდა და ლიდერებმა მხოლოდ ვაჭრობაზე ისაუბრეს.
ტრამპმა დასძინა, რომ საუბარი „ორივე ქვეყნისთვის ძალიან დადებითი დასკვნით დასრულდა.” და თქვა, რომ აშშ-სა და ჩინეთის წარმომადგენლები „მალე შეხვდებიან ლოკაციაზე, რომელიც ჯერ არ არის განსაზღვრული.”
პრეზიდენტმა განაცხადა, რომ სი ძინპინმა ის ჩინეთში ვიზიტით მიიწვია და ტრამპმაც ანალოგიური შეთავაზებით უპასუხა.
ჩინეთის სახელმწიფო საინფორმაციო სააგენტო „სინხუას“ ცნობით, საუბარი ტრამპის თხოვნით შედგა.
ეს საუბარი მნიშვნელოვანი მოვლენაა აშშ-სა და ჩინეთს, მსოფლიოს ორ უდიდეს ეკონომიკას შორის დაძაბული სატარიფო დაპირისპირების ფონზე.
ეს ამ ორ ლიდერს შორის ჩატარებული საუბრის პირველი დადასტურებული შემთხვევაა მას შემდეგ, რაც ტრამპი თეთრ სახლში დაბრუნდა.