«Ўзбектелеком» Humans'нинг даъволарига муносабат билдирди
2025 йил май ойида Humans Ўзбекистон Республикаси Истеъмолчилар ҳуқуқларини ҳимоя қилиш ва рақобатни ривожлантириш қўмитасига мурожаат қилиб, «Ўзбектелеком»га қарши антимонопол иш қўзғатишни сўраган. Улар давлат оператора «монопол юқори нарх» ўрнатгани ва қарз сабаб Humans учун интернет тезлигини туширганини иддао қилган.
«Ўзбектелеком» Humans виртуал оператор сифатида ўз тармоғига инвестиция қилмаганини ва 2020 йилдан бери «Ўзбектелеком» тармоғи асосида хизмат кўрсатиб келаётганини маълум қилди.
Компания Humansнинг «Ўзбектелеком» томонидан босимга учраётгани ҳақидаги даъволарини асоссиз деб баҳолади. Аксинча, Humans бошқа операторлар — Ucell, Beeline, Mobi.uz билан ҳам шартнома асосида ишлаш ҳуқуқига эга.
«Ўзбектелеком» Humans томонидан шартнома мажбуриятларини мунтазам бузиш ва катта миқдордаги қарзларни узоқ муддат тўламаслик ҳолатлари мавжудлигини билдирди. Компания, фойдаланувчиларнинг ҳуқуқлари бузилмаслиги учун, хизмат кўрсатишни тўхтатмаган.
2025 йил 8 май куни Тошкент шаҳар иқтисодий суди «Ўзбектелеком» даъвосини қаноатлантириб, Humans’дан қарзни ундириш тўғрисида қарор чиқарган.
Компания нотўғри маълумот тарқалиши давом этса, ўз хизмат доираси ва обрўсини ҳимоя қилиш учун судга мурожаат қилиш ҳуқуқини сақлаб қолади. «Ўзбектелеком» очиқлик, адолатли рақобат ва қонунчиликка амал қилишга содиқлигини таъкидлаб, Humans билан ҳам конструктив мулоқотга тайёрлигини билдирган.