Фарзона Фозилова таиландлик рақибасини енгиб, олтин медални ютиб олди!
-48 кг вазн тоифасида ўтказилган финал учрашувида ҳамюртимиз Фарзона Фозилова мезбонлар шарафини ҳимоя қилган таиландлик Тҳипсатча Ёдваре билан рингга кўтарилди. Ушбу учрашувнинг ҳар бир дақиқаси ўзига хос шиддат, ҳаяжон ва кутилмаган бурилишларга бой бўлди.
Жангнинг илк раундида Фарзона фаол ва қатъий ҳаракатлари билан устунликни қўлга киритди. Бироқ иккинчи раундда мезбон спортчи Ёдваре ўзида куч топиб, ҳужумкор ҳаракатлари билан ҳисобни тенглаштириб олди. Бокс мухлислари ва мутахассислари учинчи ҳал қилувчи раундни интзорлик билан кутишди.
Сўнгги ва ҳал қилувчи раундда Фарзона Фозилова яна бир марта юксак руҳият ва ғалаба учун курашиш қобилиятини намоён қилди. У рақибадан кўра тезкор ва аниқ зарбалар билан ҳакамларнинг эътиборини тортишга муваффақ бўлди. Натижада, ушбу раундда кўрсатилган ажойиб ҳаракатлари билан Фарзона ҳакамларнинг қарорини ўз фойдасига ҳал қилди ва Таиландда Ўзбекистон байроғини баланд кўтариб, олтин медални қўлга киритди.
Фарзонанинг бу ғалабаси юртдошларимиз учун катта қувончга сабаб бўлди ва турнирда иштирок этаётган бошқа ҳамюртларимизга ҳам руҳий куч берди. Энди эса бизнинг яна бир умидимиз – Феруза Казакованинг финал жанги кутиб турибди. Унинг рақибаси ҳам мезбон мамлакатнинг вакили Натнича Чонгпронгкланг бўлиб, бу тўқнашув ҳам муросасиз ва қизғин кечиши шубҳасиз.
Фарзона Фозилова эришган бу ғалаба нафақат спортчимиз учун шахсий муваффақият, балки бутун Ўзбекистон бокси учун ҳам нуфузли ютуқдир. Унинг бу ажойиб натижаси бошқа спортчиларимизнинг ҳам ўзларига бўлган ишончини янада оширишга хизмат қилади.
Биз эса Феруза Казаковага бўлажак жангда муваффақият тилаб қоламиз. Ўзбекистон шарафини муносиб ҳимоя қилаётган боксчиларимизга кейинги учрашувларда ҳам омад ва ғалаба ёр бўлишини тилаймиз!