Гасперини “Аталанта”ни тарк этди — Римда янги саҳифа очилади

Италия футболида ёзнинг энг тассирли ва рамзий воқеаларидан бири содир бўлди — “Аталанта” клуби билан тўққиз йиллик шарафли тарих яратган Жан Пьеро Гасперини бош мураббийлик лавозимини расман тарк этди. Унинг айтишича, бу қарорни шахсан ўзи қабул қилган ва унда клуб раҳбариятининг фаол роли бўлмаган.

— Фақат сўнгги соатларда бу ажойиб саёҳатга якун ясаш вақти келганини англадим. Аммо мен “хайрлашув” сўзини ёқтирмайман. Бу фақат янги чақириқ сари ташланган қадам, — деди Гасперини хайрлашув мактубида.

“Аталанта”нинг қайта туғилишига йўл очган мураббий

2016 йилда жамоа бошқарувини қўлга олган Гасперини “Аталанта”ни мутлақо янги босқичга олиб чиқди. Унинг бошчилигида клуб доимий равишда А Серия юқори поғоналарида жой олди, мухлисларни лол қолдирадиган ҳужумкор футбол намойиш қилди ва ёш истеъдодларни катта саҳнага олиб чиқди.

2024 йилда қўлга киритилган Европа Лигаси ғалабаси “Аталанта” тарихидаги илк халқаро соврин сифатида Гасперинининг номини абадий сақлаб қолди. Шунингдек, жорий мавсумда жамоа А Серияда 3-ўринни эгаллаб, Чемпионлар лигасига йўлланмани ҳам қўлга киритди.

Янги манзил — “Рома”

Гасперинининг кетиши ортидан унинг келгуси манзили ҳам маълум бўлди — тажрибали мутахассис Римнинг “Рома” клубига бош мураббий этиб тайинланиши кутилмоқда. Бу ўзи айтган “катта ва ҳайратланарли чақириқ”нинг бошланиши сифатида баҳоланмоқда.

Мутахассиснинг айтишича, у катта эҳтирос ва янги илҳом билан йўлга отланмоқда. Италия футболидаги яна бир йирик клубни бошқариш имконияти унга куч ва адреналин бағишлаётганини яширмади.

Хулоса қилиб айтганда, Жан Пьеро Гасперини нафақат “Аталанта” учун, балки Италия футболи учун ҳам символик шахсга айланган. Энди унинг “Рома”да қандай саҳифа очиши эса барча футбол ишқибозлари учун катта қизиқиш уйғотмоқда.