«Ливерпуль» чемпионлик учун янги юлдузларни олиб келмоқда: трансферлар бошланди!

Англия Премьер-лигасининг амалдаги чемпиони «Ливерпуль» раҳбарияти клуб тарихидаги энг ёрқин дебют мавсумларидан бирини ўтказган бош мураббий Арне Слотга миннатдорчилик ифодаси сифатида йирик трансферларни амалга оширишга киришди.

Ҳозирги пайтда «қизиллар» трансфер бозорида жуда фаол. Биринчи навбатда мерсисайдликлар Германиянинг «Байер» клубидан иқтидорли ҳимоячи Жереми Фримпонгни сотиб олганини расман эълон қилди. Жуда тезкор ва техник жиҳатдан кучли бўлган бу ҳимоячи янги мавсумдан Арне Слот қўл остида майдонга тушади.

Аммо бу ҳали ҳаммаси эмас. «Байер»нинг яна бир юлдузи, бутун Европанинг эътиборида бўлган 21 ёшли Флориан Вирц ҳам «Ливерпуль» сафига қўшилишга қизиқиш билдирмоқда. Истеъдодли немис футболчисининг Арне Слот билан ишлаш истаги катта эканлиги айтилмоқда. Агар бу трансфер амалга ошса, «қизиллар»нинг ҳужумкор ўйин услуби янада кучайиши кутилмоқда.

Бундан ташқари, «Ливерпуль» раҳбарияти ҳужум чизиғини ҳам қайтадан кучайтириш ниятида. Daily Mail нашри маълумотларига кўра, мерсисайдликлар олдинги чизиқ учун Европанинг учта кучли форварди номзодини аниқлаб қўйган. Улар орасида – «Айнтрахт» ҳужумчиси Уго Экитике, «РБ Лейпциг»нинг юлдуз футболчиси Беньямин Шешко ва Испаниянинг «Атлетико Мадрид» клубида порлаган аргентиналик Хулиан Альварес бор.

Уго Экитике бу мавсумда Германия чемпионатида ўзининг кучли физикаси ва ҳаводаги ўйини билан ажралиб турди. Унинг тезлиги ва кучли зарбалари «Ливерпуль» учун идеал вариант бўлиши мумкин.

Словениялик Беньямин Шешко эса «РБ Лейпциг» клубидаги ажойиб мавсуми билан барча топ-клубларнинг диққат марказига тушган. Унинг голга бўлган тинимсиз ташналиги ва юқори голли потенциали Арне Слот услубига мос келади.

Ҳулиан Альварес эса Европа ва Жанубий Америка футбол мухлисларига яхши таниш бўлган форвард. Унинг юқори техникаси, майдондаги позицион ақл-заковати ва кучли зарбалари «Ливерпуль» учун ажойиб танлов бўлиши мумкин.

«Ливерпуль» раҳбарияти бу учала футболчи учун ҳам трансфер музокараларини бошлаб юборган ва улардан бирини ёзги трансфер ойнасида жамоага олиб келиш ниятида.

Шундай қилиб, Арне Слот раҳбарлигидаги «қизиллар» келаси мавсумда яна бир бор Премьер-лигада чемпионлик учун жиддий кураш олиб боради. Клубнинг ушбу йирик трансферлари эса миллионлаб мухлисларнинг орзу-умидларини янада оширмоқда.