غزې ته د مرستو رسېدو پر مهال د ملګرو ملتونو په ګودام کې خونړۍ پېښه

"د وږو خلکو ډلې" د چهارشنبې په ورځ (د می ۲۸مه) په جګړه ځپلې غزه کې د ملګرو ملتونو یو ګودام مات کړ. دا پېښه هغه مهال رامنځته شوه چې مرستې د قحطۍ پر څنډه ولاړ فلسطین ته ورسیدې.

دا په داسي حال کې ده چې متحده ایالات د اسراییل او حماس ترمنځ د احتمالي اوربند لپاره نوي شرایط چمتو کوي.

امریکا او اروپايي ټولنه حماس ډله د یوه ترهګر سازمان په توګه پېژني.

د خوړو نړیوال پروګرام په وینا لومړني راپورونه دا دي چې د غزې په مرکزي ګودام کې دوه کسان مړه شوي او څو نور ټپیان شوي دي.

د ملګرو ملتونو ادارې د خوراکي توکو د مرستې د سمدستي زیاتوالي غوښتنه کړې "چې خلکو ته ډاډ ورکړل شي چې دوی به وږي پاته نشي."

تر زیاتیدونکي نړیوال فشار لاندې، اسراییل لس ورځې مخکې په غزه کې د ۱۱ اونیو اوږدمهاله مرستو بندیز پای ته ورساوه.

اسراییل د ملګرو ملتونو او متحده ایالاتونو په ملاتړ د غزې د بشري مرستو بنسټ ته د محدود مقدار مرستو رسولو اجازه ورکړه.

د منځني ختیځ لپاره د ملګرو ملتونو استازي سیګریډ کاګ د ملګرو ملتونو امنیت شورا ته وویل چې هغه اندازه مرستې چې اسراییل تر اوسه ملګرو ملتونو ته د رسولو اجازه ورکړې ده "له هغې کښتۍ سره پرتله کېدای شي چې د بیړۍ تر غرقېدو وروسته مرسته کوي". ده زیاته کړه چې په غزه کې خلک له قحطۍ سره مخامخ دي.

متحده ایالات هڅه کوي چې په سیمه کې اوربند ټینګ شي. اسراییل - چې په مارچ کې یې تر لنډ اوربند وروسته په غزه کې خپل پوځي عملیات بیا پیل کړل - د چهارشنبې په ورځ بریدونو ته دوام ورکړ، چې لږترلږه 30 کسان یې پکې ووژل.

په غزه کې جګړه د ۲۰۲۳ کال د اکتوبر په ۷ مه هغه مهال پیل شوه چې حماس ډلې په اسراییل کې ۱۲۰۰ کسان ووژل او شاوخوا ۲۵۰ کسان یې یرغمل کړل. د غزې د روغتیا چارواکو په وینا، له هغه راهیسې، د اسراییل حملو تر ۵۳۰۰۰ زیات فلسطینیان وژلي دي.

اسراییل د غزې د ناوړه بشري وضعیت له امله تر فشار لاندې دی. فرانسې، برتانیا، کاناډا او جرمني ویلي دي چې که پوځي عملیات ونه دریږي نو دوی به اقدام وکړي. ایټالیا د چهارشنبې په ورځ وویل چې په غزه کې پوځي عملیات نور د زغملو وړ نه دي.