Янги Land Rover Defender тақдим этилди: дизайн ва технология инқилоби!
Ташқи дизайн жиҳатдан автомобилнинг асосий фаралари янгиланди. Уларнинг дизайни сезиларли даражада ўзгариб, марказий элементлари аввалгидан кичикроқ ўлчамга келтирилган. Орқа томондаги чироқлар эса енгил тўқроқлаштирилган (тонировкаланган) кўринишга эга бўлди, бу эса Defender'га спортча ва замонавий кўриниш бахш этади.
Эътиборли жиҳатлардан бири шундаки, эндиликда барча комплектацияларда қора олд панжара стандарт тарзда ўрнатилади. Шу билан бирга, олд ва орқа бамперларнинг рангига ҳам алоҳида эътибор берилди. Улар энди кумушранг ёки кулранг тусларда бўялади ва бу билан автомобилнинг ташқи кўринишини янада замонавий ва эътиборни жалб қилувчи қилади.
Салонга назар ташлайдиган бўлсак, асосий ва муҳим янгилик бу янги авлод 13,1 дюймли катта сенсорли экранли мультимедиа тизимидир. Ушбу тизим юқори сезгирликка ва замонавий интерфейсга эга бўлиб, ҳайдовчига қулайликни ва юқори даражадаги бошқарув имкониятларини тақдим этади.
Янги Defender моделида хавфсизлик масалалари ҳам алоҳида аҳамиятга эга бўлди. Айниқса, ҳайдовчи эътиборини кузатиш учун махсус инфрақизил камера жорий этилди. У рул колонкасига яширин тарзда ўрнатилган бўлиб, ҳайдовчи чарчаган ёки диққати чалғигандан дарҳол огоҳлантириш сигналлари бериб, эҳтимолий аварияларнинг олдини олишга ёрдам беради. Камеранинг ишлаш тартибини ҳайдовчи ўз хоҳишига кўра созлаши ёки бутунлай ўчириб қўйиши ҳам мумкин.
Бундан ташқари, биринчи марта Land Rover ўзининг Defender моделини махсус йўлсиз (оff-road) шароитларга мослашган адаптив круиз-назорат тизими билан жиҳозлади. Бу технология ўта мураккаб йўлсиз релефларда ҳайдаш жараёнини максимал даражада қулайлаштиради. У автоматик равишда автомобилнинг тезлигини ва олдиндаги тўсиқларга бўлган масофани назорат қилиб, ҳайдовчига қийин вазиятларда ҳам осон бошқарув имкониятини яратади.
Двигателлар борасида Land Rover ҳозирча аниқ ўзгаришлар ҳақида маълумот бермади. Шунинг учун мутахассислар аввалги ишончли двигателлар сақланиб қолиши мумкинлигини тахмин қилмоқда. Уларнинг орасида қуйидагилар бор:
- 3,0 литрли олти цилиндрли дизел двигатель (246 ёки 345 от кучига эга);
- 2,0 литрли бензинли plug-in гибрид мотор (296 от кучи, электрда ҳаракатланиш захираси 48 км гача);
- 5,0 литрли V8 бензинли двигатель (419, 493 ва 518 от кучи).
Флагман ҳисобланган Octa версияси эса аввалги юқори даражадаги техник имкониятлари билан ишлаб чиқарилишда давом этади.
Европа бозорида янгиланган Defender’нинг бошланғич нархи тахминан 70 минг доллардан бошланиши маълум қилинди. Бу орқали Land Rover ўзининг энг машҳур моделларидан бири билан рақобатда устунликни сақлаб қолишга ҳаракат қилмоқда. Янги Defender нафақат йўлда, балки йўлсиз шароитларда ҳам ҳайдовчиларнинг ишончли ва қулай шеригига айланиши мумкин.