iPhone 16 дунё рейтингида яна етакчи: кимлар ортда қолди?
Бу муваффақиятга эришишда Apple нафақат базавий iPhone 16 билан, балки бошқа моделлари билан ҳам ўз кучини кўрсатишда давом этмоқда. Хусусан, премиум даражадаги iPhone 16 Pro Max иккинчи ўринни, iPhone 16 Pro эса учинчи ўринни эгаллади. Эътиборлиси, Хитой бозорида арзон моделларга катта миқдорда субсидиялар берилгани ва талаб кучайганига қарамасдан, Apple’нинг флагман ва премиум смартфонлари кетма-кет уч чорак мобайнида компания сотувларининг деярли ярмини ташкил қилмоқда.
Компаниянинг нисбатан арзон ва қулай модели бўлган iPhone 16e фақат февраль ойида сотувга чиққанига қарамай, март ойида жаҳон рейтингида олтинчи поғонани эгаллашга эришди. Унинг нархи 2022 йилда чиқарилган iPhone SE'дан юқорироқ бўлса-да, такомиллаштирилган техник имкониятлари ва кўпайтирилган функсиялари туфайли харидорлар орасида тез орада юқори талабга эга бўлди. Мутахассисларнинг прогнозларига кўра, йил якунига қадар iPhone 16e ўзидан олдинги бюджет моделларнинг савдо натижаларидан ошиб кетиши кутилмоқда.
Шу билан бирга, рейтингда Samsung ҳам ўзининг барқарор позицияларини сақлаб қолди. Айниқса, Galaxy A16 5G модели Шимолий Америка ва бошқа ривожланаётган бозорлардаги юқори талаб ҳисобига, юқори бешликка киришга муваффақ бўлди. Аммо компаниянинг премиум модели Galaxy S25 Ultra эса ўтган йилдаги Galaxy S24 Ultra модели билан таққослаганда, бешинчи поғонадан еттинчи ўринга тушиб кетди. Бу ҳолат асосан смартфоннинг бозорга кечроқ чиққани ва биринчи чоракда савдода камроқ вақт бўлгани билан изоҳланмоқда.
Шунингдек, бутун дунёда бюджет сегментидаги смартфонларга бўлган қизиқиш ҳам жиддий ўсишни бошдан кечирмоқда. Нархи 100 доллардан паст бўлган смартфонларнинг бозордаги улуши 20 фоизга етиб, энг тез ўсувчи смартфон тоифасига айланди. Айниқса, бу йўналишда Galaxy A06 ва Xiaomi’нинг Redmi 14C 4G смартфонлари ажралиб турмоқда. Жумладан, Redmi 14C 4G Apple ва Samsung брендига тегишли бўлмаган ягона смартфон бўлиб, сотув ҳажми бўйича ўтган йилдаги Redmi 13C 4G моделига нисбатан 43 фоиз ўсишни қайд этди.
Экспертларнинг қайд этишича, глобал иқтисодий беқарорлик, бозор ўзгаришлари ва савдо йўналишидаги турли хил омилларга қарамасдан, смартфон бозоридаги етакчи ўринлар яқин вақт ичида сезиларли даражада ўзгармаслиги тахмин қилинмоқда. Apple ва Samsung каби йирик брендлар эса яқин келажакда ҳам бозорнинг асосий ўйинчилари бўлиб қолиши кутилмоқда.
Фото: Lifehacker.ru