Көкшетауда энергетикалық сусындар жасөспірімнің асқазанын күйдіріп жіберген: видео
Көкшетауда Көпбейінді облыстық балалар ауруханасының дәрігерлері мектеп оқушысына шұғыл және күрделі ота жасады. Себебі – энергетикалық сусындарды жиі ішу ішкі ағзалардың ауыр зақымдануына алып келген.
Дәрігерлер лапароскопиялық операция жасап, жараны тіккен, құрсақ қуысын іріңнен тазалап, дренаж орнатқан.
Енді жасөспірім ұзақ уақыт сауықтыру кезеңінен өтуі керек.
"Балада асқазанның тесілген жарасы және жайылған іріңді перитонит анықталды. Мұндай ауыр диагноздың себебі – энергетиктерге әуестік.
Жасөспірімді күрделі оңалту кезеңі күтеді, енді денсаулығы бұрынғыдай болмайды. Асқазанда тыртық пен жара іздері қалады", – деді хирургия бөлімінің меңгерушісі Ернар Қожабеков.
Дәрігерлердің айтуынша, энергетиктерді шамадан тыс тұтыну жара, гастрит, жүрек аурулары және басқа да ауыр асқынуларға әкелуі мүмкін.
Сілтемесіз жаңалық оқисыз ба? Онда Telegram желісінде парақшамызға тіркеліңіз!