COVID-тің жаңа штамы: Денсаулық сақтау министрлігі мәлімдеме жасады
Қазақстан Республикасында коронавирус инфекциясы бойынша эпидемиологиялық жағдай тұрақты. Бұл туралы Санитариялық-эпидемиологиялық бақылау комитеті мәлімдеді - деп хабарлайды Tengrinews.kz тілшісі.
АҚШ- та NB.1.8.1 деп аталатын жаңа COVID нұсқасы таралып жатқаны хабарланды. Сарапшылар жаңа COVID штамы вирустың басқа нұсқаларына қарағанда жұқпалы екенін атап өтті. Алғаш рет Қытайда биыл қаңтарда анықталған.
Денсаулық сақтау министрлігі елдегі сырқаттанушылық пен әлемдегі эпидемиологиялық жағдайға апта сайын мониторинг жүргізілетінін хабарлады.
"Жыл басынан бері COVID-19-дың 362 жағдайы тіркелді. Былтырғы осы кезеңмен салыстырғанда сырқаттанушылық деңгейі 3,4 есеге төмендеген, өлім жағдайы тіркелген жоқ. Ауру жеңіл түрде өтіп жатыр, пациенттер амбулаториялық жағдайда ем қабылдап жатыр", - делінген хабарламада.
Қазақстанда вирустың айналымы мен оның әртүрлі нұсқаларына тоқсан сайын мониторинг жүргізіледі.
"Жүргізілген зертханалық бақылау нәтижелері бойынша биылғы жылы Қазақстанда анықталған барлық 100 пайыз жағдайларда Омикрон нұсқасы айналымда болды. Атап айтқанда, JN.1 қосалқы түрі және оның LF.7.1.3, LP.8.1, LF.7.6 және KP.3.1.1 тармақтары анықталған".
Сілтемесіз жаңалық оқисыз ба? Онда Telegram желісінде парақшамызға тіркеліңіз!