My.gov.uz орқали болалар лагерларига йўлланма олиш мумкин

Ўзбекистонда болаларни соғломлаштириш лагерларига йўлланмаларни онлайн тарзда расмийлаштириш имконияти яратилди, деб NOVA24 хабар берди. Энди ота-оналар my.gov.uz портали орқали қуйидаги қадамларни бажариб, йўлланма олишлари мумкин:

• Порталга кириб, "Болалар лагерларига йўлланма олиш учун ариза топшириш" хизматини танлаш.
• Йўлланма расмийлаштирилаётган бола ҳақидаги маълумотларни киритиш.
• Лагер ва қулай мавсумни танлаш.
• Йўлланма учун тўловни амалга ошириш.

Тўлов амалга оширилгандан сўнг, йўлланма автоматик равишда шакллантирилади. Банд қилинган йўлланма учун тўлов 30 дақиқа ичида амалга оширилмаса, бронь бекор қилинади ва йўлланма қайта сотувга чиқарилади.

Йўлланмалар 7 ёшдан 14 ёшгача бўлган болалар учун мўлжалланган. Ўзбекистон фуқароларининг болалари учун йўлланма нархининг 50%и Болаларни соғломлаштириш ва аҳоли саломатлигини тиклашни қўллаб-қувватлаш жамғармаси ҳисобидан қопланади. Порталдаги нархлар ушбу компенсацияни ҳисобга олган ҳолда шакллантирилган.