Самарқанд нега Ислом дунёси марказига айланмоқда? Саидов жавоб берди
Учрашув жуда самимий руҳда ўтди ва унда томонлар ўзаро ҳамкорликнинг бугунги ҳолати ва уни келгусида янада кенгайтириш масалаларини муҳокама қилдилар. Хусусан, таълим, фан ва маданият соҳаларида қўшма лойиҳаларни амалга ошириш, қўллаб-қувватлаш ва янгиликларни жорий этиш каби бир қатор муҳим йўналишлар юзасидан келишувларга эришилди.
Бахтиёр Саидов ўзининг ижтимоий тармоқдаги саҳифасида ёзишича, музокаралар якунида Ўзбекистон Ҳукумати ҳамда ICESCO ўртасида ҳаракатлар режаси имзоланди. Ушбу ҳужжат икки томонлама муносабатларни янги босқичга олиб чиқиши кутилмоқда.
2025 йил — Самарқанд учун тарихий фурсат
Учрашувнинг асосий мавзуларидан бири – Самарқанднинг 2025 йилда Ислом дунёси маданият пойтахти сифатида тан олиниши бўлди. Бу мақом шаҳар учун катта нуфуз ва халқаро майдондаги мавқеини янада мустаҳкамлаш имконини беради.
Айтиш жоизки, бу ташаббус Ўзбекистоннинг ислом цивилизациясида тутган ўрнини янада намоён қилиш, миллий меросимизни кенг тарғиб этиш ва туристик салоҳиятни оширишга хизмат қилади.
Ҳужжатга кўра, яқин келажакда Самарқандда бир қатор халқаро анжуманлар, маданий тадбирлар ва илмий форумлар ўтказилиши режалаштирилмоқда. Шу орқали шаҳар фақат тарихий эмас, балки замонавий маърифат маркази сифатида намоён бўлади.
Ўзбекистоннинг ICESCO билан муносабатлари фақат расмий ташрифлар билан чекланиб қолмай, амалий ҳамкорлик йўлида ҳам жиддий босқичга ўтмоқда. Самарқанднинг маданият пойтахти деб эълон қилиниши эса бу жараёнда муҳим бурилиш бўлиши мумкин.