Россия кутубхоналарида Трамп китобларига талаб кескин ортди
Маълум қилинишича, Магнитогорск шаҳар кутубхоналари Трампнинг “Чемпион каби ўйла. Магнатнинг ҳаёт ва бизнес ҳақидаги эътирофлари” китобини харид қилиш учун буюртма берган. Бойқўнғирдаги маданият муассасалари эса у ёзган машҳур “Келишув санъати” асарини талаб қилган.
Трамп шахсига бўлган қизиқиш фақат унинг қаламига мансуб асарлар билан чекланмаяпти. Иркутск вилоятининг Саянск шаҳридаги кутубхона Александр Немировнинг “Доналд Трамп. Ўзига хос бегона” номли биографик китобига, Челябинскда эса Игор Прокопенко томонидан ёзилган “Қарама-қарши раҳбарнинг портрети” асарига мурожаат қилган.
Шу каби буюртмалар Новий Уренгой, Якутиядаги Намский Улус ва Твер вилоятининг Бежецк шаҳарларидан ҳам тушган. Кутубхона мутасаддилари буни Трампнинг 2024 йилги АҚШ президентлик сайловларида ғалаба қозониши ва унга бўлган жамоатчилик қизиқишининг ошиши билан боғлашмоқда.
Zamin.uz таҳририяти ушбу тенденция Россия жамоатчилик онгида АҚШ сиёсий саҳнасига қандай таъсир кўрсатаётганини таҳлил қилишда давом этади. Сиз Трампнинг сиёсий мероси ва шахсий тажрибаси акс этган китобларини ўқиб кўрганмисиз? Қандай фикрдисиз?
Фото: Manuel Balce Ceneta/AP Photo/picture alliance