Қазақстандағы 2024 жыл - ең ыстық алты жылдың бірі. Қазгидромет шолуы
2024 жыл Қазақстандағы метеорологиялық бақылаулар жүргізілген 1941 жылдан бастап, бүкіл кезеңдегі ең жылы алтыншы жыл болды. Бұл туралы Қазгидрометтің 2024 жылға арналған Қазақстандағы климатының өзгеруіне шолуында айтылған, - деп хабарлайды Tengrinews.kz тілшісі.
2024 жыл Қазақстанда 1941 жылдан бергі ең жылы алты жылдың қатарына кірді. "Қазгидромет" мәліметінше, орташа жылдық температура +7,18 °C болып, климаттық нормадан (+0,87 °C) жоғары болған.
1976 жылдан бері елдегі температура әр он жыл сайын орта есеппен +0,36 °C-қа өсіп барады. Бұл – жаһандық жылынудың тұрақты белгісі.
Қай өңірлер максималды жылыну аймағында
Ең жоғары температуралық ауытқулар Шығыс, Оңтүстік-Батыс және Солтүстік-Шығыс өңірлерде, сондай-ақ Балқаш маңында тіркелді – +2,3 °C дейін. Абай облысындағы бірқатар метеостанцияларда 2024 жыл ең жылы жыл ретінде танылды.
Каспий және Балқаш: ыстық ауа райының су ресурстарына әсері
Ыстық ауа райы 2024 жылы Балқаш көлінің жағдайына айтарлықтай әсер етті – мұнда температуралық ауытқулар +2,3 градусқа дейін жетті. Бұл көлдің су балансына әсер етуі мүмкін, әсіресе оған құятын өзендердің тартылуын ескерсек.
Сол сияқты, Каспий теңізінің деңгейі де климаттың жылынуына және буланудың күшеюіне байланысты төмендеп барады. Ғалымдардың айтуынша, бұл құбылыс болашақта жағалау инфрақұрылымына, экожүйелерге және аймақтағы шаруашылық қызметке кері әсерін тигізуі мүмкін.
Жауын-шашын: рекордтан тапшылыққа дейін
Жауын-шашын мөлшері аймақтарда әртүрлі болды: Ақмола мен Жамбыл облыстарында нормадан көп жауса, Қостанай мен Қызылорда облыстарының оңтүстігінде жетіспеушілік байқалған.