Алтын құрсақты аналарға құрмет көрсетілді

Әкімдіктің кіші мәжіліс залында Мемлекет басшысының үстіміздегі жылғы 3 сәуірдегі №829 Жарлығы бойынша өмірге көп бала әкеліп, оларға ұлағатты тәрбие берген бір топ аналарды марапаттау рәсімі  өтті.
Аудан әкімі бұл наградалар тұрақтылық пен дәстүрді нығайтуда, жас ұрпақты тәрбиелеуде ата-ананың сіңірген ерекше еңбегі, балаларына берген мейірімі мен қайырымдылығы үшін тапсырылатынын атап өтіп, алтын құрсақты аналарға марапаттарын табыстады.
Аудандық ардагерлер кеңесінің төрағасы Бердібек Омаров, аудандық аналар кеңесінің төрайымы Шырын Қапарова көп балалы аналарды бүгінгі марапаттарымен құттықтап, ізгі тілектерін жеткізді.
Өз кезегінде «Күміс алқа» алған аналар қатарында, алты бала тәрбиелеп отырған Ардақ Қошанова мемлекет тарапынан көрсетіліп отырған қамқорлық пен қолдауға ризашылығын білдірді.
Марапат барысында 5 ана «Алтын алқа», 6 ана «Күміс алқа» иегері атанды. Жалпы, бүгінгі таңда, аудан бойынша «Алтын алқа» иегерлерінің саны – 732, ал, «Күміс алқа» иегерлерінің саны – 1328 құрап отырғанын айта кетейік.

Сообщение Алтын құрсақты аналарға құрмет көрсетілді появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.