Тошкентда фастфуд едирилган чақалоқ ичаги чириб, оғир операция қилинди
Фастфуд ва чақалоқ — хавфли комбинация
Маълумотларга кўра, олис вилоятдан Тошкентга келаётган она йўлда тушлик учун фастфуд — яъни лаваш ва картошка фри харид қилган. Бола йўлда йиғлаб безовта бўлаётгани сабабли, аёл фастфудни оғзида чайнаб, чақалоққа едирган. Бир неча кун ўтиб, гўдакнинг аҳволи кескин ёмонлашган.
Ичак чириши — давомли жарроҳлик талаб этадиган ҳолат
Шошилинч тиббий ёрдам маркази мутахассислари чақирилган. Шифокорлар маълум қилишича, чақалоқда доимий қайт қилиш, қорин дам бўлиши, оғриқ ва ичдан қон кетиши кузатилган. Текширувлар натижасида боланинг ичаги чиригани аниқланган.
Биринчи босқичда чириб кетган ичак қисмини олиб ташлашган ва стома — вақтинчалик ичак чиқарилиши амалга оширилган. Бу ҳолатда бола тахминан 6 ойча яшайди, сўнг яна операция орқали ички тизим тўлиқ тикланади.
Афсусли статистика: бу биринчи ҳолат эмас
Республика шошилинч тиббий ёрдам маркази Болалар жарроҳлиги бўлими шифокорларининг таъкидлашича, сўнгги пайтларда болаларда шунга ўхшаш ҳолатлар тез-тез кузатилмоқда. Кўп ҳолларда ата-оналар билмасдан чақалоқларга сомса, думба ва турли оғир таомлар едириб қўйишади. Бу эса кўпинча жарроҳлик аралашувини талаб қилувчи мураккаб оқибатларга олиб келади.
Мутлақ тавсия: 3 ёшгача она сути — энг муҳим озуқа
Педиатрлар таъкидлаганидек, 1 ёшгача бўлган болалар фақат она сути ва махсус болалар учун мўлжалланган озиқлар билан таъминланиши керак. 1 ёшдан кейингина аста-секинлик билан қўшимча овқат турларига ўтказилиши мақсадга мувофиқ.
Zamin.uz таҳририяти бола парваришидаги ҳар бир қадам — уларнинг ҳаётига бевосита таъсир қилишини эслатиб ўтади. Азиз ота-оналар, илтимос, гўдаклар саломатлиги учун беэътиборликка йўл қўйманг!
Фото: Видеодан кадр