ЦСКА мағлубият ёқасидан қайтди, Файзуллаевнинг хатоси қимматга тушди! (видео)
«RZD Arena»да ўтказилган учрашув шиддатли сценарийда бошланди. Ўйиннинг илк дақиқалариданёқ «Локомотив» ҳужумкор ўйин кўрсатди ва бу ҳаракатлар тезда ўз самарасини берди. Учрашувнинг 10-дақиқасида мезбонлар футболчиси Дмитрий Воробьёв рақиб ҳимоячиларининг хатосидан унумли фойдаланиб, ҳисобни очди – 1:0.
Биринчи бўлим ўрталарига келиб ЦСКА мураббийлар штаби ҳисобни тенглаштириш учун тезкор қарор қабул қилди. 23-дақиқада Аббос Файзуллаев майдонга туширилди ва ундан жамоа ҳужумига куч қўшиши кутилаётганди. Бироқ афсуски, ўйинга қўшилганидан икки дақиқа ўтиб, ўзбекистонлик легионер жиддий хатога йўл қўйди ва бунинг оқибатида «темирйўлчилар» иккинчи марта рақиб дарвозасини ишғол қилишди. Яна бир бор Дмитрий Воробьёв аниқ зарба билан ҳисобни 2:0 га етказди.
Иккинчи бўлимда ЦСКА буткул ўзгача кўринишда майдонга чиқди. Танаффусдан кейин тезкор гол урган Саул Гуарирапа «армиячилар»нинг ўзига бўлган ишончини қайтарди. У 47-дақиқада аниқ зарба билан ҳисобни қисқартирди – 2:1.
Бу голдан сўнг ўйин кескин тус олди. Ҳар икки жамоа ҳам ғалаба учун бор кучини ишга солди. 80-дақиқага келиб, ЦСКАнинг босими натижа берди. Матвей Кисляк ажойиб зарба билан дарвозани ишғол қилди ва ҳисобни тенглаштирди – 2:2.
Учрашув сўнггига қадар ғолиб аниқланмади. Натижада «Локомотив» ўз майдонида муҳим ғалабани қўлдан чиқарган бўлса, ЦСКА эса ғалабани қўлга киритишга яқин бўлиб туриб, охир-оқибат дуранг натижа билан кифояланди.
Бу натижадан кейин ЦСКА турнир жадвалида юқори ўринлар учун курашни давом эттирмоқда, «Локомотив» эса Европа кубоклари зонасига яқинлашиш имкониятини қўлдан чиқарди.
Zamin.uz таҳририяти футбол оламидаги қизиқарли воқеаларни кузатишда давом этади. Сиз ушбу баҳсни қандай баҳолайсиз?