კრემლის ცნობით, პუტინის და ტრამპის სატელეფონო საუბარი 17:00 საათზეა დაგეგმილი
ამერიკის შეერთებული შტატების და რუსეთის პრეზიდენტების, დონალდ ტრამპის და ვლადიმირ პუტინის სატელეფონო საუბარი მოსკოვის დროით 17:00 საათზე დაიწყება. ამის შესახებ დღეს, 19 მაისს ჟურნალისტებს განუცხადა კრემლის პრესმდივანმა, დმიტრი პესკოვმა.
მისივე თქმით, ეს იქნება „მნიშვნელოვანი საუბარი სტამბოლში გამართული მოლაპარაკებების გათვალისწინებით“.
უკრაინასა და რუსეთს შორის 16 მაისს, სტამბოლში გამართული მოლაპარაკების შედეგად მხარეები ტყვეეთა გაცვლაზე შეთანხმდნენ. ცეცხლის უპირობოდ შეწყვეტაზე რუსეთი ისევ უარს ამბობს.
ორი დღით ადრე, 17 მაისს აშშ-ის პრეზიდენტმა დონალდ ტრამპმა თავის სოციალურ ქსელ Truth Social-ში დაწერა, რომ რუსეთის პრეზიდენტ ვლადიმირ პუტინთან ორშაბათს(19 მაისს), ვაშინგტონის დროით 10:00 საათზე ექნება სატელეფონო საუბარი, რომლის თემები იქნება სისხლისღვრის შეწყვეტა და ვაჭრობის საკითხები.
ტრამპის თანახმად, პუტინის შემდეგ საუბარი ექნება უკრაინის პრეზიდენტ ზელენსკისთან.
პუტინი მიიჩნევს, რომ ტრამპთან სატელეფონო საუბრის წინ ძლიერი პოზიციები აქვს. ამის შესახებ Bloomberg-ი წერს ინფორმირებულ წყაროზე დაყრდნობით. რუსეთის პრეზიდენტი დარწმუნებულია, რომ რუსული არმია წლის ბოლოსთვის შეძლებს უკრაინის თავდაცვის ხაზის გარღვევას, რის შედეგადაც სრულ კონტროლს დაამყარებს უკრაინის დონეცკის, ლუგანსკის, ზაპოროჟიეს და ხერსონის ოლქებზე.
რუსეთმა უკრაინის ეს ოთხი რეგიონი თავის ტერიტორიად გამოაცხადა უკრაინაში ფართომასშტაბიანი შეჭრიდან რვა თვეში, 2022 წლის 30 სექტემბერს, თუმცა სრულად ვერცერთ მათგანს ვერ აკონტროლებს.
2014 წლიდან რუსეთის მიერ ანექსირებულია უკრაინის ყირიმის ნახევარკუნძული.