Хитойлик олимлар дронлар ёрдамида сунъий ёмғир ёғдирди
Кимёвий таъсир билан келтирилган ёмғир
Хитой олимлари булутларга таъсир ўтказиш учун кумуш йодид моддасидан фойдаланишди. Тажриба Тян-Шан тоғлари этигида жойлашган Баянбулоқ яйловлари устида олиб борилди. Дронлар 5 минг метр баландликда ҳаракатланган ва ҳар бири 125 граммлик кукун шаклидаги кумуш йодидни сониясига 28 грамм тезликда ҳавога пуркаган. Умумий сарф — 997 граммни ташкил этган.
Кам миқдордаги моддага қарамасдан, олимлар 8 минг квадрат километр майдонда қўшимча ёғингарчилик кузатилишини қайд этишди. Бу ҳосил қилинган ёмғирнинг ҳажми ва таъсир ҳудуди бўйича кутилган натижалардан анча юқори бўлган.
Технология ва экологик самара
Бу ишлар Хитой Метеорология бошқармасига қарашли Булутларни модификация қилиш физика лабораторияси ҳамда Шинжондаги об-ҳавони ўзгартириш маркази томонидан ўтказилган. Ёғингарчиликнинг ортган миқдори уч хил йўл билан баҳоланди: ёмғир томчилари сенсорлари, 50 йиллик иқлим маълумотлари билан таққослаш ва компьютер моделлаштириш. Ҳар учала усул ҳам натижанинг 3.8–4.3% атрофида ошганини кўрсатди.
Кумуш йодиддан фойдаланиш илк бор XX аср ўртасида қўлланилган бўлса-да, бугун дронлар ёрдамида бажариш технологиянинг аниқлиги ва хавфсизлигини сезиларли даражада оширмоқда.
Қишлоқ хўжалиги ва сув хавфсизлиги учун янги ечим
Тадқиқот муаллифларидан бири Ли Биннинг таъкидлашича, бу тажриба қурғоқчиликка қарши курашишда ва иқлим ўзгаришларига мослашишда катта имконият яратиб бериши мумкин. Шинжон каби ёғингарчилиги паст ҳудудлар учун бу технология сув таъминоти ва озиқ-овқат хавфсизлигини таъминлашда муҳим воситага айланиши кутилмоқда.
Zamin.uz таҳририятидан:
Хитой олимлари дронлар орқали осмонга таъсир кўрсатиш орқали табиатни ўзгартириш соҳасида яна бир инқилобий қадам ташлади. Ушбу технология келажакда бутун дунёда қурғоқчилик ва об-ҳаво ўзгаришларига қарши курашда муҳим воситага айланиши мумкин. Сиз бу тажриба ҳақида қандай фикрдасиз?
Сиз булутларга дрон орқали таъсир қилишни қўллаб-қувватлайсизми?
Фото: Ianed