Хаби Алонсо: Роналду “Реал”га қисқа муддатга қайтиши мумкин
Гап шундаки, ФИФА томонидан янги форматда ташкил этилган Клублар ўртасидаги жаҳон чемпионатида иштирок этувчи жамоаларга қисқа муддатли трансфер амалиёти орқали янги футболчиларни қўшиш имконияти берилган. Хусусан, турли клублар шу турнир учун Роналдуни ўз таркибига қўшиб олиш истагини билдиришган.
Хаби Алонсо эса ушбу имкониятни айнан “Реал” учун қулай деб ҳисобламоқда. Унинг фикрича, Роналду каби футболчи, ҳатто 40 ёшида ҳам, жамоага муҳим баҳсларда катта тажриба ва мотивация олиб келиши мумкин. Мураббий “қаймоқранглилар” тарихидаги энг яхши тўпурарнинг кам таркибдаги турнирда жамоага бир ой давомида ёрдам бериши ғоясини қўллаб-қувватлаяпти.
Маълумотларга кўра, Роналдунинг ҳозирги жамоаси — Саудиянинг “Ан-Наср” клуби билан тузилган шартномаси 30 июнда тугайди. Томонлар ҳамкорликни узайтириш бўйича музокаралар олиб бораётган бўлса-да, ҳозирча бирор аниқ келишувга эришилмаган.
Эътиборлиси, ФИФАнинг расмий рухсати туфайли ушбу турнирдаги жамоалар вақтинчалик шартнома асосида собиқ юлдузларни ўз таркибига жалб қилиш имконига эга. Роналдунинг “Реал”га қисқа муддатли қайтиши эса клуб мухлислари учун ҳақиқий сюрпризга айланиши мумкин.
Zamin.uz таҳририяти “Реал Мадрид” атрофидаги барча муҳим ўзгаришлар ва трансфер имкониятларини ёритишда давом этади. Сиз Роналдунинг қайтиши ҳақида қандай фикрдасиз?