Бугун 7 нафар боксчимиз "World Boxing" кубоги финалида олтин медал учун рингга кўтарилади
Турнирнинг сўнгги кунида рингга чиқадиган вакилларимиз ва уларнинг рақиблари билан танишиб чиқамиз:
-55 кг вазн тоифасида жаҳон чемпиони Миразизбек Мирзаҳалилов моғулистонлик маҳоратли чарм қўлқоп устаси Билгуунсаихан Харху билан рақобат қилади. Бу қизиқарли қарама-қаршилик соат 16:45 да бошланади.
-65 кг вазн тоифасида умидли боксчиларимиздан бири бўлган Асадхўжа Мўйдинхўжаев болгариялик Викторио Илиевга қарши чемпионлик учун жанг олиб боради. Ушбу баҳс соат 17:00 га белгиланган.
-80 кг вазн тоифасида майдонга тушадиган вакилларимиздан Жавоҳир Умматалиев италиялик кучли рақиб Алфред Коммей билан рингда учрашади. Уларнинг жангини соат 17:15 да кузатиш мумкин.
Қизлар ўртасида эса Ўзбекистоннинг истеъдодли боксчиси Хуморабону Мамажонова 57 кг вазнда чемпионлик учун Польша шарафини ҳимоя қилаётган Жулиа Сзеремета билан куч синашади. Ушбу финал баҳси соат 20:15 га мўлжалланган.
-75 кг вазн тоифасидаги шарафли жангда Фазлиддин Эркинбоев Болгариядан келган рақиби Рами Киванга қарши ўз маҳорат ва иродасини намойиш этади. Бу қизиқарли ва ҳал қилувчи баҳс соат 21:30 да бошланади.
-85 кг вазн тоифасида Акмалжон Исроилов Польша вакили Якуб Страсзевски билан куч синашиб, ғолиблик учун охиригача кураш олиб боради. Улар ўртасидаги жанг соат 21:45 да ўтади.
Ва ниҳоят, оғир вазн тоифасида (+92 кг) мамлакатимизнинг энг кучли вакилларидан бири ҳисобланган Жаҳонгир Зокиров норвегиялик Омар Шиҳа билан чемпионлик учун курашади. Оғир вазндаги жангларнинг энг қизиқарли ва томошабоп бўлиши кутилмоқда. Ушбу курашни соат 22:15 да кўришингиз мумкин.
Ўзбекистон бокс федерациясининг маълум қилишича, барча боксчиларимиз бугунги муҳим жангларга юқори даражада тайёргарлик кўрган ва ғалаба қозонишга тўлиқ тайёр. Терма жамоамиз вакиллари мусобақанинг илк босқичларидан бери ўз рақибларини ишончли тарзда мағлубиятга учратиб келмоқда. Бунинг натижасида ҳал қилувчи босқичда Ўзбекистон жамоаси энг кўп вакил билан иштирок этаётган мамлакатлардан бирига айланди.
Zamin.uz таҳририяти мамлакатимиз шарафини ҳимоя қилаётган боксчиларимизга бугунги финал баҳсларида муваффақият ва омад тилайди. Энг яхши натижалар ва ғалабалар ҳақида тезкор ахборотларни биздан кутиб қолинг!