Коррупцияга қарши курашда янги босқич: ҳар ҳафта жойларда таҳлил ва танқидий муҳокама
Коррупцияга қарши курашиш агентлиги тарқатган расмий маълумотларга кўра, йиғилишда барча ҳудудлар “Андижон тажрибаси” асосида ишлаб чиққан “йўл хариталари” атрофлича кўриб чиқилди. Бу ҳужжатлар ҳудудларда маиший коррупцияга чек қўйиш, барқарор муросасиз муҳит яратиш ва тизимли таҳлил орқали хавф-хатарни бартараф этишга қаратилган.
Кенгайтирилган йиғилиш жараёнида қатор давлат идоралари ва ҳуқуқни муҳофаза қилувчи органлар вакиллари иштирок этди. Мазкур йиғилиш ташкилий ва натижага қаратилган руҳда ўтди.
Ҳар ҳафта — битта ҳудуд, битта таҳлил
Йиғилишда ҳудудий ишчи гуруҳларга алоҳида вазифа юклатилди. Унга кўра, ҳар ҳафтада жойлардаги коррупция хавфи юқори бўлган объектларга бориб, ҳолатни ўрганиш, муаммони аниқлаш ва аниқ чоралар кўриш талаб этилади. Бу орқали муаммолар “қоғозда” эмас, реал ҳаётда ҳал қилиниши кераклиги урғуланди.
Республика ишчи гуруҳи — назорат ва таҳлил марказида
Республика даражасида фаолият юритувчи ишчи гуруҳ аъзолари эса ҳудудлардан олинаётган маълумотларни назорат қилиб бориши, ҳар ҳафта жойлардаги амалий натижаларни таҳлил қилиши ва танқидий муҳокамалар ташкил қилиши белгиланди. Шу орқали тизимли ёндашув таъминланиши кўзда тутилмоқда.
Видеоконференция форматда ўтган йиғилишда: вилоятлар, туманлар ва прокуратура идоралари онлайн тарзда боғланган. Бу ечимлар марказдан тортиб то маҳаллагача етказилиши ва барча даражадаги раҳбарларнинг масъулияти оширилаётганидан дарак беради.
Муҳим масалалар — аниқ топшириқлар
Йиғилиш якунида “йўл хариталари” асосида белгиланган вазифаларни ўз вақтида, сифатли ва масъулият билан амалга ошириш, ишчи гуруҳлар фаолиятини самарали йўлга қўйиш бўйича аниқ топшириқлар берилди. Шунингдек, коррупциявий омилларни камайтиришга қаратилган таклифлар тайёрлаш вазифаси ҳам кўндаланг қўйилди.
Zamin.uz таҳририяти мазкур ташаббусларнинг амалий ижросини кузатишда давом этади. Коррупцияга қарши курашда ҳар бир ҳудуддаги реал натижалар — тизимдаги ўзгаришлар самараси бўлади. Сиз нима деб ўйлайсиз: ҳар ҳафтадаги таҳлиллар ҳақиқий ўзгаришларга олиб келадими?