Tesla компаниясининг Optimus роботи рақсга тушди: Илон Маск ҳайратлантирувчи видеони эълон қилди
???? pic.twitter.com/NzqAmN3F5z
— gorklon rust (@elonmusk) May 13, 2025
Tesla роботлари лойиҳаси раҳбари Милан Ковач маълум қилишича, бу роботнинг ҳаракатлари автоном агентлар асосида қарор қабул қиладиган замонавий дастурий таъминот билан такомиллаштирилган. «Ҳозирча бу фақат дастлабки натижалар бўлиб, яқин келажакда робот янада барқарор ва мукаммал ҳаракатланади», — деди у.
Илон Маск эълон қилган видеода роботнинг ҳаракатлари табиий ва реал вақт режимида тасвирга олинган бўлиб, роботга хавфсизлик троси улангани ҳам кўриниб туради. «Бу хавфсизлик троси роботнинг мувозанатини сақлашга эмас, балки эҳтимолий йиқилишнинг олдини олиш учун ўрнатилган», — деб тушунтирди миллиардер.
Tesla ўзининг Optimus роботининг янгиланган талқинини биринчи марта 2023 йил декабр ойида тақдим қилган эди. Бу модель ўзининг аввалги версияси билан солиштирганда анча мукаммаллашган ва ҳаракатларни назорат қилиш тизими сезиларли даражада яхшиланган. Шунингдек, роботнинг тезлиги 30 фоизга ошган, оғирлиги эса 10 килограммга камайган.
Optimus роботининг янгиланган талқини Tesla томонидан сунъий интеллект ва робот техникаси соҳасидаги муҳим ютуқлардан бири сифатида қаралмоқда. Бу гуманоид робот келажакда инсонларга турли соҳаларда, жумладан, ишлаб чиқариш ва уй-рўзғор ишларида ҳам ёрдам кўрсатиши мумкин.
Илон Маск Tesla компанияси инсонлар билан роботларнинг ҳамжиҳатликда яшашига асосланган янги асрни бошлашига ишончи комиллигини бир неча бор таъкидлаган. Optimus роботининг бугунги ютуқлари эса бу мақсад йўлида ташланган муҳим қадамлардан бири бўлди.