Доналд Трамп Сурияга нисбатан санкцияларни бекор қилмоқчи: «Сурияга тикланиш учун имкон берамиз»
«Сурия яна бир бор тикланиш ва буюклик сари қадам ташлаши учун уларга қарши қўлланган санкцияларни бекор қилишга қарор қилдим», — деди АҚШ етакчиси ўз нутқида.
Президент Трампнинг сўзларига кўра, у ушбу муҳим қарорни қабул қилишдан олдин Суриядаги ҳозирги вазият бўйича Саудия Арабистонининг валиаҳд шаҳзодаси Муҳаммад бин Салмон ҳамда Туркия президенти Ражаб Тоййиб Эрдўған билан маслаҳатлашган ва уларнинг фикрини инобатга олган.
Эслатиб ўтамиз, Башар Асад режими 2024 йилнинг декабрь ойида қулаган эди. Суриянинг собиқ раҳбари Россия ҳудудига қочиб кетган ва Москва унга сиёсий бошпана берган. Асаддан кейин мамлакатнинг ўтиш даври президенти сифатида Аҳмад аш-Шаръа тайинланганди.
Маълумотларга кўра, Доналд Трампнинг Яқин Шарққа ташрифи унинг АҚШ президентлигига иккинчи марта қайтганидан кейин амалга оширган биринчи йирик расмий хорижий сафари бўлиб, у ушбу ташриф давомида Суриянинг янги раҳбари Аҳмад аш-Шаръа билан ҳам шахсан учрашишни режалаштирган.
Axios нашрининг хабар беришича, Трамп ушбу қадамлар билан Яқин Шарқда барқарорлик ва иқтисодий тикланиш жараёнларига янги туртки беришни мақсад қилган. Санкцияларнинг бекор қилиниши Сурияда тинчлик ва барқарорликни тиклаш, шунингдек, мамлакат иқтисодий инфратузилмасини ривожлантиришга хизмат қилиши кутилмоқда.
Халқаро таҳлилчиларнинг фикрича, АҚШ томонидан қабул қилинаётган ушбу қарор Сурия ва бутун Яқин Шарқ минтақаси учун муҳим тарихий воқеа бўлиб, минтақа мамлакатлари орасидаги муносабатларни яхшилашга ҳамда халқаро иқтисодий ҳамкорликни кенгайтиришга ёрдам бериши мумкин.