Шенсни "Барселона"да қоладими? Унинг келажаги оилавий муҳокамаларда ҳал бўлади
"Менга икки йиллик янги шартнома таклиф қилишди, лекин..."
Шенснининг айтишича, у “Барселона”да қолиш масаласини ҳозирча оила аъзолари билан муҳокама қилмоқда:
“Менга ҳурмат билан янги шартнома борасида қизиқиш билдиришди. Лекин бу фақат менга боғлиқ масала эмас. Мен барча муҳим қарорларни оилам билан бирга қабул қиламан. Ҳозир эса қайси йўл бизнинг ҳаётимиз учун маъқулроқ бўлишини англашга ҳаракат қиляпмиз.”
Дарвозабон қўшимча қилди:
“Уйдаги аксарият қарорларни рафиқам қабул қилади. Мен бундан ҳеч қачон уялмайман. Футбол борасида ўзим қарор чиқараман, аммо бу гал вазият бошқача. Сабаби биз аслида фақат бир йилга келишга қарор қилган эдик — орзумизни амалга ошириб, кейин гольф ўйнаб яшаш учун. Энди эса кўп нарса ўзгариб кетди.”
“Келгуси ҳафталарда аниқ жавоб бўлади”
Польша терма жамоаси посбони қарорни яқин ҳафталарда қабул қилишини айтди:
“Бу ерда қолиш ёки кетиш ҳақида ҳали қатъий фикр билдиролмайман. Кўчиш, болаларнинг ўқиши, ташкилий ишлар каби омиллар бор. Ҳозир эса шунчаки бу жойдаги ҳар бир лаҳзадан завқ олаяпман.”
Шенснининг жорий мавсумдаги статистикаси
Тажрибали посбон Ла Лигада 14 та учрашувда иштирок этди ва уларнинг 7 тасида ўз дарвозасини соғ сақлашга эришди. Унинг ишончли ўйини жамоага бир неча муҳим очколар келтирди.
Zamin.uz таҳририяти Войцех Шенснига қандай қарор қабул қилмасин — омад ва барқарорлик тилаб қолади. Агар у “Барселона”да қолса, бу жамоанинг мустаҳкам ҳимояси учун катта ютуқ бўлади.