Ферран Торрес: «Ханси Флик биздаги яширин иқтидорни юзага чиқармоқда»
Ферран Торреснинг сўзларига кўра, германиялик мутахассис нафақат профессионал жиҳатдан, балки инсон сифатида ҳам жамоада катта ҳурмат қозонган. Флик ҳар доим футболчилар билан яқин алоқада бўлиб, уларнинг ҳол-аҳволини сўрайди ва ҳар бир ўйинчига шахсан эътибор қаратади.
«Флик билан машғулотлар нафақат қизиқарли, балки ўта самарали ҳам ўтмоқда. У бизга мунтазам равишда рақибларимиз ўйинларидан видеоларни намойиш этади ва қандай ўйнаш кераклигини тушунтириб беради. Энг муҳими, у жамоадаги ички муҳитни мустаҳкамлаш ва футболчилар орасидаги тарангликларни юмшатишга алоҳида эътибор қаратади. Флик – мотивация беришнинг ҳақиқий устаси», – деб таъкидлади Ферран Торрес.
Шунингдек, Торрес Ханси Фликнинг футболчилардаги яширин иқтидорларни қандай очиб беришини алоҳида қайд этди: «У биздаги бор салоҳиятни топиб, уни юзага чиқаришни жуда яхши билади. Ҳар бир ўйинчи ундан ўзини муҳим ҳис қилади».
«Барселона» мухлислари ҳам Фликнинг келиши билан жамоанинг ўйини ва натижалари яхшиланганидан мамнун бўлиб, унга катта ишонч билдиришмоқда.
Эслатиб ўтамиз, 11 май куни Каталония клуби ўзининг ашаддий рақиби – «Реал Мадрид»га қарши муҳим беллашувни ўтказади. Футбол оламида «Эл Класико» деб аталувчи мазкур баҳс Тошкент вақти билан соат 19:15 да старт олади.
Жамоа ва мухлислар айнан шу ўйинда ҳам Ханси Фликнинг самарали услуби ёрдамида ажойиб натижага эришишдан умид қилишмоқда. Ферран Торрес каби ёш футболчилар эса, бу баҳс орқали ўзларининг юқори савияларини намойиш этиш имкониятига эга бўладилар.