Си Цзинпиннинг соғлиғи бўйича янги тахминлар тарқалди: Хитой раҳбари инсулт ўтказган бўлиши мумкинми?

Сўнгги вақтларда Хитой Халқ Республикаси раиси Си Цзинпиннинг ташқи кўриниш ва ҳаракатларида кузатилаётган ўзига хос ўзгаришлар унинг соғлиғи ҳақидаги турли тахминларга сабаб бўлмоқда. Айрим кузатувчиларнинг фикрича, мамлакат раҳбари жиддий касаллик билан курашаётган бўлиши эҳтимолдан холи эмас.

Бу ҳақда «Китайская угроза» («Хитой таҳдиди») телеграм-канали хабар тарқатди. Хабарда таъкидланишича, Си Цзинпиннинг бошини доимий равишда чап томонга эгиб юриши кўпчиликда у инсулт каби оғир касалликни бошидан кечирган бўлиши мумкинлиги ҳақидаги гумонларни келтириб чиқармоқда.

Мутахассисларнинг фикрига кўра, инсон бош миясининг ҳаракат қобиғи ёки базал ганглиялар деб аталувчи қисмлари шикастланса, бўйин мушакларининг бир томони кучли тартилиб қолиши кузатилади. Натижада, инсоннинг боши беихтиёр бир томонга эгик ҳолатда қолиши мумкин. Си Цзинпинда кузатилаётган бу ҳолат айнан шу физиологик муаммолар натижаси бўлиши эҳтимол қилинади.

Шу билан бирга, ҳозирча бу тахминларни тасдиқлайдиган расмий ёки тиббий тасдиқланган бошқа далиллар мавжуд эмас. Хитой расмийлари ҳам бу хабарларга нисбатан ҳеч қандай баёнот бермаган.

Бироқ, бундай тахминларнинг пайдо бўлиши биринчи марта эмас. Аввал ҳам халқаро оммавий ахборот воситалари Хитой раҳбарининг соғлиғига оид турли тахминларни эълон қилган эди. Бундан ташқари, айрим сиёсий таҳлилчилар бу каби ахборотлар Хитой ички сиёсатидаги мувозанатни ўзгартириш учун атайлаб тарқатилаётган бўлиши мумкинлигини ҳам тахмин қилмоқда.

Хозирча расмий Пекин бу мавзуда сукут сақламоқда ва Си Цзинпин мунтазам тарзда турли халқаро тадбирларда иштирок этишда давом этмоқда. Унинг соғлиғи ҳақидаги хабарлар эса асосан ижтимоий тармоқларда ва айрим норасмий каналларда тарқалмоқда.

Халқаро ҳамжамият бу масала бўйича расмий маълумотлар берилишини кутмоқда. Айниқса, Хитой каби йирик мамлакат раҳбарининг соғлиғи нафақат давлат ичида, балки бутун жаҳон сиёсат сахнасида ҳам катта аҳамият касб этади.