Роналдунинг характери сабабли "Ал-Наср" унинг шартномасини узайтирмаслиги мумкин
Айниқса, клуб раҳбарияти ва мураббийлар штаби португалиялик юлдузнинг мағлубиятлардан кейин жамоадошларига нисбатан кескин муносабати ва ўзининг ўта ўжар ва талабчан характери билан боғлиқ ҳаракатларидан норози экани таъкидланмоқда.
"Ал-Наср" клуби Роналдуни трансфер қилганидан сўнг кўплаб юлдуз даражасидаги футболчиларни ҳам ўз сафига қўшиб олган бўлса-да, жамоанинг натижалари ҳалигача клуб раҳбарияти ва мухлислар томонидан кутилаётган даражага етмади. Жамоа бирорта кубок ёки чемпионликни қўлга кирита олмади, бу эса клуб раҳбарларини жиддий ташвишга солаётгани маълум қилинмоқда.
Айтиш лозимки, Роналду ва клуб раҳбарияти ўртасида янги шартнома бўйича дастлаб оғзаки келишувга эришилган эди. Аммо энди португалиялик футболчининг кескин характери, юқори талаблари ва доимий равишда ўз фикрини ўтказишга уриниши сабабли "Ал-Наср" раҳбарияти бу келишувни расмийлаштиришдан воз кечиши мумкинлиги ҳақида гапирилмоқда.
Шунингдек, араб клуби бошқарувчилари бу каби вазият клуб ичидаги муҳитга салбий таъсир қилаётганидан ва келажакда бошқа футболчилар билан муносабатларга ҳам зарар етказишидан хавотирланмоқда.
Ҳозирча "Ал-Наср" томонидан расмий қарор эълон қилинмаган бўлса-да, вазиятни кузатаётган таҳлилчилар клуб раҳбарияти янги шартномадан воз кечиш билан бирга, футболчи билан ҳамкорликни бутунлай тўхтатиши эҳтимолини ҳам инкор этмаяпти.
Бу ҳолат футбол оламида катта шов-шувларга сабаб бўлиши мумкин. Чунки Роналдунинг Саудия Арабистонидаги фаолияти катта қизиқиш билан кузатилмоқда ва унинг клубдан кетиши кейинги манзили ҳақида саволларни пайдо қилади.
Бироқ вазият қандай якун топишидан қатъи назар, португалиялик юлдузнинг келгуси фаолияти ва клубнинг якуний қарори мухлислар томонидан катта қизиқиш билан кутилаётгани аниқ.