Совет даврида учирилган «Космос-482» космик аппарати Ҳинд океанига қулаб тушди
Бу ҳақда Россиянинг «Роскосмос» космик агентлиги расман хабар берди.
«Космос-482» фазовий кемаси Совет Иттифоқининг Венера сайёрасини ўрганишга қаратилган сайёралараро тадқиқот дастури доирасида учирилган. Унинг асосий вазифалари орасида Венера сайёрасининг зич атмосфераси, сайёра юзасининг таркиби, юқори ҳарорат, босим ва ёритилиш шароитларини ўрганиш бўлган.
«Роскосмос» агентлигининг маълум қилишича, космик аппарат ҳаракат блокида юзага келган техник носозлик сабабли Ер атрофидаги юқори эллиптик орбитада қолиб кетган ва секин-аста сайёрага яқинлашиб, охир-оқибат Ер юзасига қулаб тушган.
Шу ўринда таъкидлаш лозимки, бир муддат аввал дунё оммавий ахборот воситалари мазкур фазовий қурилманинг Ерга қайтиши ҳақида кўплаб тахминларни илгари сурган эди. Айрим манбалар эса унинг Марказий Осиё ҳудудига, шу жумладан Ўзбекистонга қулаш эҳтимолини ҳам истисно қилмаган эди.
Бугунги хабар билан мазкур тахминларга ойдинлик киритилди ва «Космос-482» аппаратининг қулаши кўплаб тахминларга якун ясади.