Ўзбекистонда гўшт нархи нега ўсмоқда? Қишлоқ хўжалиги вазирлиги тўлиқ баёнот билан чиқди

Сўнгги ойларда бозорларда гўшт нархи кўтарилаётгани жамоатчиликнинг асосий эътибор марказига айланган. Ушбу масала юзасидан Ўзбекистон Қишлоқ хўжалиги вазирлиги расмий баёнот эълон қилди. Ҳужжатда гўшт таннархига таъсир кўрсатаётган омиллар, ички ва ташқи бозордаги вазият, ҳамда нархларнинг ҳозирги ҳолати атрофлича ёритилган.

Расталардаги нархлар қандай?

Вазирликнинг маълумотларига кўра, бугунги кунда:

• арзонлаштирилган бозор расталарида мол ва қўй гўшти 65–75 минг сўмдан,
  
• оддий савдо расталарида — 90–95 минг сўмдан,
  
• савдо марказларида эса 95–100 минг сўмдан сотилмоқда.
  

Тошкентда бу соҳа бўйича аниқ таҳлил ҳам берилган:

• 65–75 минг сўмлик гўшт харидорларнинг 15–18 фоизини,
  
• 90–95 минг сўмлик рўзғорбоп гўшт — 82–85 фоизини,
  
• 110–130 минг сўмлик лаҳм (суяксиз) гўшт — атиги 1–2 фоизни ташкил этмоқда.
  

Глобал тенденциялар: фақат Ўзбекистонда эмас

Вазирлик таъкидлашича, гўшт нархи ошиши фақат маҳаллий ҳолат эмас, балки бутун дунёда кузатилаётган глобал жараён.

• Россияда товуқ гўшти нархи 9,7% га,
  
• Қозоғистонда эса 4,7% га қимматлашган.
  

Шу билан бирга, Ўзбекистондаги нархлар глобал бозор тебранишларига нисбатан барқарор экани қайд этилди.

Таъминот ва етукчилик даражаси

2025 йилнинг биринчи чорагида гўшт нархига таъсир этган асосий омиллар сифатида қуйидагилар тилга олинган:

• озуқа хом ашёсининг қимматлашиши,
  
• электр энергияси ва ёқилғи харажатларининг ошиши,
  
• чорва молларини етарли озуқа билан таъминлаш даражаси — атиги 35–40%.
  

Озуқа нархларидаги ўсиш эса назарий эмас, аниқ рақамларда акс этган:

Ишлаб чиқариш ва импорт: рақамлар нимани кўрсатмоқда?

2024 йилда:

• 2,9 миллион тонна тирик вазнда,
  
• 1,7 миллион тонна сўйилган вазнда гўшт ишлаб чиқарилган.
  
• Импорт — 93 минг тонна (умумий ҳажмнинг 5,4%).
  

Импорт қилинган гўштнинг 70% қайта ишлаш корхоналарига, қолгани эса деҳқон бозорларида арзонлаштирилган расталар орқали аҳолига етказиб берилган.

Ўртача импорт нархи — 4 доллар. Асосий етказиб берувчилар — Беларусь ва Қозоғистон.

Халқаро солиштирма: гўшт қаерда қанча?

Вазирлик маълумотларига кўра, Ўзбекистон гўшт энг арзон сотиладиган давлатлардан бири, Марказий Осиёда эса Қирғизистондан кейин иккинчи ўринда.

Zamin.uz таҳририяти ушбу таҳлилни кундалик эҳтиёжлар билан боғлиқ нарх-наво тушунчасини соғлом ва холис баҳолаш имконини берувчи қадам деб ҳисоблайди. Истеъмолчилар учун муҳим бўлган ечим — нархни танқид қилиш эмас, балки унинг ортидаги омилларни тушуниш ва тўғри қарор қабул қилишдир.