Air Samarkand авиакомпанияси Самарқанддан Тель-Авивга илк парвозини амалга оширди
Шу тариқа, Air Samarkand Исроил йўналишида парвозларни амалга ошираётган Ўзбекистоннинг тўртинчи авиакомпанияси бўлди. Бу йўналишда аввалроқ Uzbekistan Airways, Qanot Sharq ҳамда Centrum Air каби авиакомпаниялар ўз парвозларини амалга ошираётган эди.
Тель-Авивдаги машҳур "Бен-Гурион" аэропортида ушбу йўналишнинг биринчи парвозида ташриф буюрган йўловчиларни тантанали кутиб олиш маросими ташкил этилди. Тадбирда Air Samarkand авиакомпаниясининг Исроилдаги расмий вакили ва Asia Travel туристик компаниясининг асосчиси Ниссан Мушаев ҳам иштирок этиб, самимий сўз билан чиқиш қилди.
Air Samarkand авиакомпанияси мазкур йўналиш бўйича дастлаб ҳафтада бир марта – ҳар якшанба куни мунтазам авиақатновларни амалга оширмоқда. 2024 йилнинг 10 июль санасидан бошлаб эса, йўловчилар талабидан келиб чиқиб, ҳар пайшанба куни ҳам қўшимча рейсларни йўлга қўйиш режалаштирилмоқда.
Самарқанд ва Тель-Авив ўртасидаги ушбу янги авиақатнов икки мамлакат ўртасидаги иқтисодий, маданий ва туристик алоқаларни янада ривожлантиришда муҳим аҳамият касб этиши кутилмоқда.