პუტინის ცალმხრივი ზავის პირველმა ღამემ დრონებით თავდასხმის გარეშე ჩაიარა
რუსეთს პრეზიდენტის, ვლადიმირ პუტინის მიერ ცალმხრივად გამოცხადებული სამდღიანი ზავის პირობებში უკრაინის ცაზე უპილოტო საფრენი აპარატები არ გამოჩენილა, თუმცა იტყობინებიან სუმის ოლქის დაბომბვის შესახებ.
სუმის ოლქში ბომბის ჩამოგდებაზე ცნობა უკრაინის საჰაერო ძალებმა 8 მაისის ღამის 03:00 საათისთვის გაავრცელეს.
არ შეინიშნება უკრაინული დრონებით რუსეთის ქალაქებზე მასირებული იერიშიც - თუ წინა დღეებში რუსული მხარე ასობით უკრაინული დრონით იერიშისა და ამ დრონების ჩამოგდების შესახებ იტყობინებოდა, ხუთშაბათს ღამით რამდენიმე და მხოლოდ დაუდასტურებელი ინფორმაცია გავრცელდა უკრაინული დრონების გამოჩენაზე.
პუტინის მიერ 28 აპრილს ცალმხრივად გამოცხადებული დროებითი ზავი გრინვიჩის დროით 10 მაისის 21:00 საათამდე იმოქმედებს და უკავშირდება მოსკოვში 9 მაისს დაგეგმილ საზეიმო ღონისძიებებს. "დიდ სამამულო ომში გამარჯვების" 80 წლისთავისადმი მიძღვნილ ღონისძიებებში მონაწილეობისთვის მოსკოვში ჩასვლას 20-მდე ქვეყნის ლიდერებიც აპირებენ.
ზავის გამოცხადებაზე უკრაინასთან რაიმე სახის მოლაპარაკება არ გამართულა, გარდა რუსეთის მხრიდან გაკეთებული განცხადებისა, რომ კიევმაც უნდა მისდიოს ამ მაგალითს.
უკრაინის პრეზიდენტმა ვოლოდიმირ ზელენსკიმ უარყო პუტინის მიერ 28 აპრილს ცალმხრივად გამოცხადებული დროებითი ზავი. მან ზავს „დიდი თეატრალური წარმოდგენა“ უწოდა და თქვა, რომ უკრაინა მზადაა ზავისთვის ნებისმიერი დღიდან, მაგრამ არა სამი, არამედ 30 დღით.
სააღდგომოდ, 20 აპრილს გამოცხადებული ცეცხლის შეწყვეტის პირობის დარღვევაში მოსკოვი და კიევი ერთმანეთს ადანაშაულებდნენ.