Таиландга борувчи ўзбекистонлик сайёҳлар учун янги тартиб жорий этилди

Таиланд қироллиги Ташқи ишлар вазирлиги мамлакатга киришнинг янги электрон тизими ишга тушганини расман эълон қилди. Бу ҳақда Ўзбекистон Республикаси Ташқи ишлар вазирлиги матбуот хизмати маълум қилди.

Қайд этилишича, 2025 йилнинг 1 май санасидан бошлаб, Таиландга ташриф буюрадиган барча хорижий фуқаролар электрон кириш картасини (Thailand Digital Arrival Card, TDAC) олишлари мажбурий бўлади. Ушбу электрон картани мамлакатга етиб келишдан 3 кун аввал махсус онлайн платформа орқали расмийлаштириш талаб этилади.

«Шу муносабат билан Таиландга ташриф буюришни режалаштираётган барча ўзбекистонлик фуқаролардан мазкур ўзгаришларни инобатга олишларини ҳамда белгиланган тартибга амал қилишларини сўраймиз», — дейилади вазирлик мурожаатида.

Маълумот ўрнида эслатиб ўтамиз, 2024 йил 15 июлдан бошлаб Таиланд қироллиги ҳукумати Ўзбекистон билан бир қаторда жаҳоннинг 93 мамлакати фуқаролари учун муддати 60 кунгача бўлган визасиз кириш режимини расман жорий қилган эди.

Эндиликда визасиз саёҳат қилиш билан бир қаторда, электрон кириш картасини ҳам олдиндан тўлдириш талаб этилади. Бу жараённи ўз вақтида амалга ошириш орқали мамлакат чегарасидан ўтишдаги кечикиш ва ноқулайликларнинг олдини олиш мумкин.