Қишки трансферлар ойнасининг сўнгги кунларида Элдор Шомуродов атрофида кескин ўзгаришлар юз бермоқда. “Рома” раҳбарияти 29 ёшли ҳужумчини бошқа клубга ўтказиб, ўрнига бошқа марказий ҳужумчи олиб келишга уринаётган эди.
Элдор учун “Венеция, “Эмполи” ва “Кальяри” клублари ўзаро рақобат олиб бораётган паллада Клаудио Раньери легионеримизни “Удинеза” ва “Айнтрахт”га қарши учрашувларда бир неча дақиқага майдонга туширди.
Ҳар икки учрашувни юқори савияда ўтказган Шомуродов Европа Лигаси доирасида немислар дарвозасига гол урганидан кейин Раньери уни жамоада қолишини таъкидлади.
“Рома” мухлислари Шомуродов ҳақида ижтимоий тармоқларда ўз муносабатларини билдирмоқда.
Tyler Jay Smith:Элдорни етарли даражада қадрлашмаяпти ва “Рома” ундан нега қутилмоқчи бўлаётганини ҳеч ким тушунмаяпти. Клуб Шомуродовни ушлаб қолиб, ёнига яна бир ҳужумчи олиши керак.
Luca Ridolfi:Шомуродов “Рома”да қолсин!
Giallorosso Lupo:Кейинги ўйинни Шомуродов асосий таркибда бошласин. Довбик илк дақиқадан ўйнашга арзимайди.
Rey Gascon:Шомуродов ажойиб гол урди.
Ham Der Nico:Довбик “Рома” тарихидаги энг ёмон ҳужумчи. Аслида Элдор ундан анча кучли.
IL Capitano:Шомуродовдан ажойиб гол ижросини кўрдик. Зўр ўйнаб берди.
La Voce Dei Romanisti:“Рома” мавсум давомида бир неча маротаба бўлгани каби бу гал ҳам жуда зўр ўйнади, 90 дақиқа ҳаракат қилди, гол уриш учун жуда кўп имконият яратди.
Кетиши кутилаётган Шомуродовнинг ғалабада хизматлари жуда катта бўлди. Элдор ҳақиқий профессионал эканини намойиш қилди.
Franco Cavallari:Дўстлар, бир таклиф бор... Артём Довбик ва Лоренцо Пеллегринини “Венеция”га жўнатиб, Элдор Шомуродовни Римда олиб қолайлик!
Albert Morina:Шомуродов 23 дақиқа ичида Артём Довбик 20 та ўйинда югурган масофадан ҳам кўпроқ ҳаракат қилди ва рақибга босим ўтказди. Бундан кейин асосий ҳужумчи Элдор, унинг ўринбосари Довбик бўлиши керак.
Агар Шомуродовга Довбикка берилганидек кўп вақт тақдим қилинса, у жамоамизнинг энг зўр тўпурарига айланган бўларди.
Эслатиб ўтамиз, Элдор Шомуродов жорий мавсумда ўзи иштирок этган мусобақалар – А Серия, Италия кубоги ва ниҳоят, Европа лигасида ўз ҳисобига гол ёздириб қўйишга муваффақ бўлди.
