Қишки трансферлар даврида энг кўп муҳокама қилинаётган мавзулардан бири ҳамюртимиз Абдуқодир Ҳусановнинг қайси гранд клубга ўтиши бўлиб турибди.
Айниқса, ўзбек футболчиси учун курашга “Манчестер Сити” ва “Реал” каби қудратли клубларнинг қўшилгани деярли барча ўзбекистонлик ишқибозларини бу мавзуни янада диққат билан кузатишга мажбур қилмоқда.
Абдуқодир Ҳусановнинг машҳурлиги ортиб кетгани таъсирида Ўзбекистон миллий терма жамоаси сардори Элдор Шомуродовнинг ҳолати бироз эътибордан четда қолиб кетгандек. Зеро, 29 ёшли ҳужумчининг номи Италия трансфер бозорида кўп
айланмоқда.
Маълумки, ўзбек футболи тарихида терма жамоамиз учун энг кўп гол урган Шомуродовнинг клуб миқёсидаги фаолияти ўзи кутганидек кечмаяпти. Мана нечанчи мавсумдирки, ҳамюртимиз “бўрилар”нинг асосий таркибида етарли ўйин амалиётига эга бўлмаяпти. Ҳар трансфер ойнаси очилган вақтда Элдор ўзига жамоа танлашига тўғри келмоқда.
Бу гал ҳам легионеримиз олдида ана шундай масъулият турибди. Италия матбуоти, хусусан siamolaroma.it сайти эксперти Федерико Тонинининг таъкидлашича, январнинг дастлабки кунларида ўзбек футболчисига жиддий қизиқиш билдираётган клублар учтани ташкил қилмоқда. Булар “Кальяри”, “Эмполи” ва “Венеция”.
Қизиғи шундаки, Элдор Италиядаги фаолияти давомида турли йилларда ҳар учала жамоа дарвозасини ишғол қилган.
“Рома” раҳбарияти анчадан бери Элдор Шомуродовни бошқа клубга тўлиқ трансфер қилиш йўлини қидириб келади. Бироқ ўзбек футболчисига қизиқаётган клублар асосан мусобақа жадвалининг қуйи қисмидан ўрин олган ва ўйинчига маош тўлаш борасида пойтахт клуби билан тенглаша олмайди. Элдорнинг маоши уларга оғирлик қилади.
Il Messaggero газетасига кўра, “Рома” мутасаддилари Шомуродов бўйича қарорини ўзгартирди. Энди клуб даъвогар жамоаларга осиёлик легионерини тўлиқ сотиб олиш талабини қўймайдиган бўлди.
-
Элдор Шомуродов “Рома” билан вақтинчалик бўлса-да, хайрлашишга тайёр. Ўзбек ҳужумчиси Клаудио Раньери режаларига кирмайди, клуб унга қимматли ўйин вақтини кафолатлайдиган вариант қидирмоқда. Айни пайтда Шомуродовга “Кальяри”, “Венеция” ва “Эмполи” каби ҳужум чизиғини кучайтиришни кўзлаган жамоалар қизиқиш билдирмоқда.
“Рома”нинг мақсади ўзбек легионерини ижарага жўнатиш ва бу орқали унинг трансфер нархини кўтариш. Шомуродов ўтган мавсум оғир жароҳат туфайли узоқ муддат майдондан ташқарида қолган бўлса-да, кейинчалик “Кальяри” учун муҳим бўлган голларни ура олди. Энди у бошқа жамоада бўлса-да, мавсум охирига қадар ўзини кўрсатиб, фаолиятини тиклаб олиши керак, - деб ёзмоқда siamolaroma.it сайти эксперти Федерико Тонини.
Тўғрисини айтганда, Элдор Шомуродов “Рома” учун бироз қимматроққа тушган. Transfermarkt порталида римликлар ўзбек ҳужумчиси учун “Женоа”га жами 19,6 миллион евро тўлагани қайд этилган. Ушбу нуфузли манбада ўзбек футболчисининг айни пайтдаги трансфер суммаси 4 миллион еврогача арзонлагани кўрсатилган.
Демак, “Рома”нинг ҳозирча Элдор Шомуродов билан тўлиқ хайрлашиш режаси йўқ. Бироқ қишки трансферлар вақтида бошқа клубга ижарага жўнатиш варианти бирламчи бўлиб турибди. Кутамиз, тез орада янгилик бўлиб қолиш эҳтимоли катта...
