Тошкент вилоятида иситиш ва иссиқ сув нархлари ошади

2025-йил 1-февралдан бошлаб Тошкент вилоятида аҳолига тақдим этиладиган иситиш ва иссиқ сув хизматлари тарифлари 9−15 фоизга оширилади. Бу ҳақда вилоят кенгаши томонидан 6-январ куни тасдиқланган қарорга таянилиб "Газета.uz" хабар берди.

Мазкур ўзгаришлар «Иссиқлик манбаи», «Ангрен иссиқлик энергияси», «Чирчиқ иссиқлик энергияси» ва «Олмалиқ иссиқлик манбаи» корхоналарининг хизматларига тааллуқли.

Масалан, «Иссиқлик манбаи» корхонаси хизмат кўрсатаётган ҳудудларда, жумладан Зангиота, Қибрай, Оҳангарон, Тошкент, Бўстонлиқ, Юқоричирчиқ туманлари ва Янгиё‘l, Нурафшон, Бекобод, Оҳангарон, Пискент шаҳарларида аҳоли учун иссиқлик энергияси нархи 14,9 фоизга ошиб — 81 312 сўмдан 93 464 сўмга (ҚҚС билан) кўтарилади.

Шунингдек, ҳисоблагич борида 1 куб метр иссиқ сув нархи 4472,16 сўмдан 5144,16 сўмга (15 фоизга), ҳисоблагичсиз эса бир кишига тўғри келадиган тўлов 17 466,4 сўмдан 20 076,11 сўмга кўтарилади.

Бошқа ташкилотлар ва корхоналар учун тарифлар анча оширилади. Мисол учун, бюджет ташкилотлари учун иситиш нархи тўрт баробар кўтарилиб, 560 000 сўмга етади, улгуржи истеъмолчилар учун эса икки ярим баробар ошиб, 358 400 сўмни ташкил этади.

Эслатиб ўтамиз, 2024-йил ноябрь ойида Тошкент шаҳрида ҳам иссиқ сув ва иситиш тарифлари 15 фоизга оширилган эди. Шу билан бирга, 2025-йилда мамлакат бўйлаб бу тарифларни йилига икки марта ошириш режалаштирилган.